Психологиялық тәжірибе: теория мен тәжірибенің бірлігі

Тленчиева Н.С.

Педагогика ғылымдарының кандидаты

Адилова Э.Т.

Психология ғылымдарының докторы

Бахытжан Е.Б.

Психология мамандығының студенті

Әл-Фараби атындағы ҚазҰУ

Психологиялық тәжірибе: теория мен тәжірибенің үйлесімі

Қазіргі таңда еліміздегі ғылым мен білімнің алға басуына ықпал ететін жетекші жоғары оқу орындарының бірі – Әл-Фараби атындағы Қазақ ұлттық университеті. Бұл университет еліміздің зияткерлік әлеуетін қалыптастыруда, жоғары білікті мамандарды даярлауда айрықша рөл атқарып келеді. QS (Ұлыбритания) халықаралық рейтинг агенттігінің зерттеулері бойынша, ҚазҰУ 2024 жылы әлемнің үздік 150 университетінің қатарына енді. Сонымен қатар, ҚазҰУ әлемдегі ең инновациялық және технологиялық дамыған 50 университеттің қатарында. Белгілі "GreatValueColleges" халықаралық ұйымының рейтингіне сәйкес, ҚазҰУ ТМД елдері, Шығыс және Орталық Еуропаның жалғыз өкілі ретінде танылып, Азия құрлығында үздіктер қатарынан көрінді.

Әл-Фараби атындағы ҚазҰУ еліміздің білім мен ғылым саласындағы көшбасшысы ғана емес, сонымен қатар болашақ мамандарды жан-жақты дамытып, тәжірибелік білім алуға ерекше мән береді. Осы орайда, университет студенттерді тәжірибелік оқытуға бағытталған оқу бағдарламаларын әзірлеп, олардың кәсіби дағдыларын шыңдауға мүмкіндік жасайды. Осындай мүмкіндіктердің бірі – психологиялық тәжірибе болып табылады. Мен де осы оқу ордасының студенті ретінде кәсіби тәжірибеден өтіп, психология саласындағы білімімді жетілдіру мүмкіндігіне ие болдым.

Психология ғылымы тек теориялық біліммен шектелмейді, ол адамдардың шынайы өмірімен, олардың сезімдері мен ойларымен тығыз байланысты. Сондықтан, психологиялық білімді тәжірибе жүзінде меңгеру өте маңызды. Менің тәжірибелік оқуым "Сымбат дизайн және технологиялар академиясы" мекемесінде өтті. Бұл орталық – болашақ мамандардың кәсіби дамуына зор мүмкіндік беретін бірегей орын. Мұнда мен әртүрлі психологиялық жағдайларды зерттеп, адамдарға көмек көрсетудің нақты әдістерін меңгердім.

Қазіргі таңда психологиялық қызметтердің маңызы артып келеді. Көптеген адамдар өмірлік қиындықтармен бетпе-бет келгенде, кәсіби психологтардың көмегіне жүгінеді. Осы орайда, менің практикам барысында байқағаным – психологиялық қолдаудың адамдар өміріндегі орны ерекше. Клиенттермен жүргізілген жеке және топтық терапиялар, психодиагностикалық әдістер мен түзету-дамыту жұмыстары тәжірибемнің маңызды бөлігіне айналды. Бұл менің теориялық білімімді шыңдап, кәсіби құзыреттілігімді арттыруға көмектесті.