Қауіпсіз орта сапалы білім кепілі туралы мақала

Қауіпсіз орта – сапалы білім кепілі

Білім беру жүйесінің басты ұстанымы – сапалы білім мен саналы тәрбие беру екені сөзсіз. Алайда қазіргі қоғамда бұл мақсаттарға тек білім бағдарламаларын игерумен шектелмей, оқушыларға қауіпсіз, жайлы және қолайлы орта қалыптастыру арқылы ғана қол жеткізуге болады. Өйткені, адам дамуының алғашқы сатысында бала өз ортасынан не алады – болашақта соны қайталайды. Оқушы өзін қауіпсіз сезінетін ортада ғана білім алуға ынталанады, дамуға, ашылуға, армандауға ұмтылады. Сондықтан мектептегі білім сапасы мен тәрбие жүйесінің табысты болуы – ең алдымен білім алушының жан-жақты қорғалған, сенімді ортада болуымен тығыз байланысты.

Е.Бозғұлов атындағы №249 мектеп-лицейі ұжымы үшін бұл қағида жай ұран емес, нақты іске айналған күнделікті жұмыс принципі. Біз білім беру мекемесінің қабырғасында тек оқытушылық үдерісті ғана емес, сонымен қатар баланың тұлғалық қауіпсіздігін де жоғары деңгейде қамтамасыз етуді өзімізге міндет еттік. Осы жүйелі жұмыстың нәтижесінде, мектепте соңғы үш оқу жылы ішінде бірде-бір қылмыстық оқиға мен суицид әрекеті орын алған жоқ. Бұл – құрғақ мәлімет емес, бұл – мұғалім мен ата-ананың, оқушы мен полиция бөлімінің, әкімшілік пен қоғамның бірлесе жүргізген қажырлы еңбегінің айқын жемісі.

Мектеп қабырғасында жүзеге асырылып жатқан қауіпсіздік саясаты бірнеше маңызды бағыттарды қамтиды. Ең алдымен, оқушылардың құқықтық сауаттылығын арттыруға бағытталған кешенді тәрбие шаралары тұрақты өткізіліп тұрады. “Құқықтық мәдениет – болашақ кепілі”, “Мен және заң”, “Зорлық-зомбылыққа жол жоқ” секілді тақырыптарда дөңгелек үстелдер, пікірсайыстар, семинарлар ұйымдастырылады. Әрбір оқушы өз құқығын, міндетін біліп қана қоймай, қоршаған ортамен қарым-қатынас жасауда шектеулі, мәдениетті болуға үйренеді. Мұндай сабақтар балалардың бойында заң алдындағы жауапкершілікті ерте жастан сіңіруге, оларды өз әрекетіне сын көзбен қарап, салдарын болжай алатын деңгейге жеткізуге бағытталған.

Оқушылардың бос уақытын тиімді ұйымдастыру да қауіпсіз орта қалыптастырудың негізгі алғышарттарының бірі. Мектебімізде үйірмелер мен секциялар, клубтар мен еріктілер тобы тұрақты жұмыс істейді. Осы арқылы оқушылардың қызығушылығы ескеріліп, оларды жағымсыз ортадан, кері әсерлерден алшақ ұстауға мүмкіндік туады. Сонымен қатар, «Тұлпар» ер балалар ұйымы мен «Ай-Сана» қыздар клубы сынды бастамалар оқушыны ұжымдық жұмысқа, ортақ құндылықтарға тәрбиелеудің тиімді құралдарына айналып отыр.