Қазақ тілін орыс сыныптарында оқыту әдістемесі

«Владимиров жалпы білім беретін мектебі» КММ

Баяндама тақырыбы: Орыс сыныптарындағы қазақ тілі мен әдебиетін оқытудың

әдістемесі

Дайындаған: қазақ тілі мен әдебиеті мұғалімі Нурмагамбетова А.Б.аа

2023-2024 оқу жылы

Орыс сыныптарындағы қазақ тілі мен әдебиетін оқытудың

әдістемесі

Тіл тағдыры — ел тағдырына айналып отырған қазіргі қазақ тілінің кінәратты жағдайында оқушы бойында мемлекеттік тілге деген сүйіспеншілікті қалыптастыруға, қазақ тілі арқылы жасалған ойдың кестелі өрнектеріне үңілтіп, ауызша, жазбаша сөздік қорларын молайтуға,шығармашылық қабілетін дамытуға, пәнге деген қызығушылығын арттырып,білімсапасын тереңдетіп, мемлекеттік тіліміздің қолдану аясын кеңейтуге, Тіл туралы заңды жүзеге асыруға барынша қолғабыс ету- әрбір қазақ тілі пәні мұғалімінің міндеті болуға тиіс. Ал қоғамымыздағы мұғалім алдында тұрған міндет- сапалы білімді, саналы тәрбиелі, экономикалық ойлауы дамыған, жалпы адамзаттық құндылықты меңгеруде шығармашылық,іскерлік пен дағдысы қалыптасқан, жан-жақты мәдениетті жеке тұлғаны қалыптастыру екені сіздер мен бізге белгілі.

Тұңғыш Елбасы Н.Ә.Назарбаевтың «Қазақстанның болашағы- мемлекеттік тілінде» атты жолдауын іске асыруға Қазақстан азаматтарының әрқайсысы үлес қосуға міндетті, оның ішінде қазақ тілі мен әдебиеті мұғалімдері тіл жанашырлары қатарынан орын алатындықтан, тапжылмай еңбек етіп үлестерін қосуға міндетті.

Қазіргі таңда Қазақстанда білім кеңістігінде жаңа бағдар жүйесі жүріп жатыр. Бұл жағдай орыс мектептеріндегі қазақ тілі мен әдебиетін жүргізудің талаптарын өзгертуге жол салады. Орыс мектептеріндегі қазақ тілі мен әдебиетін оқытып үйрету қиын да, күрделі жұмыс екенін білеміз. Басқа ұлтқа қазақ тілін оқыту әдістемесі оқушының ана тілінің ерекшелігін ескере отырып, оны үйретудің түрлі тиімді жолдары бар. Орыс тілінде оқытатын мектепте қазақ тілін оқыту әдістемесі орыс тілін оқыту және шет тілдерін оқыту әдістемесімен тығыз байланысты. Орыс тілді мектепте қазақ тілін оқытудың өзіндік көптеген ерекшеліктері кездеседі. Орыс тілінде оқитын мектептерде мемлекеттік тілді оқыту әдістемесінің негізгі міндеті оқушылардың қазақша білетін азаматтармен қазақ тілінде күнделікті тығыз қарым-қатынаста болуы деп есептеймін.

Менің басты мəселемнің бірі орыс тілінде сөйлейтін оқушылардың тіл үйренуге деген құлшынысының болмауы ғана емес, оларға қазақ тілін меңгеру айтарлықтай қиын екендігінде сияқты. Бұл болашағымыз үшін маңызды əрі шешуді талап ететін мəселе болғандықтан, мен «Орыс мектептеріндегі қазақ тілі мен әдебиеті пәндерін оқытудың тиімді әдістері» атты әдістемелік тақырыпты таңдадым. Менің әдістемелік тақырыбымның негізгі міндеттері: жас ұрпақ арасында қазақ тілінің мәртебесін көтеру, қазақ тілін оқытудың тиімді жолдарын табу, қазақ тілін білу сапасын арттыру.

Өз сабақтарымда қазақ тілін едəуір тиімді үйрету мақсатында қазақ тілін тиімді үйретуге көмектесетін əдістемелерді пайдаланамын. Қазіргі уақытта қазақ тілі мен әдебиеті пәндері жаңа әдіске сәйкес оқытылады.

Бұл техниканың мәні-бірінші кезекте оқушыларға қазақ тілінде жиі қолданылатын белсенді сөздерді оқып үйрену, олардың лексикасын біртіндеп арттыру. Осылайша, оқыту жағдайы ең алдымен ең жиі қолданылатын сөздерді үйренуден басталады, содан кейін жиі қолданылмайтын сөздерге көшеді.