Қорғаныс басқармасындағы психолог тәжірибесі туралы мақала

Наурызбай ауданының Қорғаныс істері жөніндегі басқармасындағы психолог ретіндегі тәжірибем.

Әл-Фараби атындағы Қазақ ұлттық университеті – Қазақстандағы ең беделді жоғары оқу орындарының бірі. Университетімнің студенті ретінде мен тек теориялық білім алып қана қоймай, оны тәжірибемен ұштастыруға да мүмкіндік алдым. Әсіресе, психология саласында оқитын студент үшін нақты ортада жұмыс істеп, адамдармен тікелей байланыс орнату өте маңызды.

Менің тәжірибем Алматы қаласы Наурызбай ауданының Қорғаныс істері жөніндегі басқармасында өтуде. Бұл жердегі негізгі міндетім – әскери қызметке шақырылушылар мен әскери қызметкерлердің психологиялық жағдайын бағалау, олармен әңгімелесу және психологиялық бейімделуге көмектесу. Әскер – адамның физикалық қана емес, психологиялық тұрғыдан да үлкен өзгерістерді бастан өткеретін орны. Сондықтан психологтың көмегі олардың қызметке дайындық деңгейін арттыруға, қорқыныш пен мазасыздықты жеңуге септігін тигізеді.

Сонымен қатар , тәжірибе барысында мен тек дәстүрлі психологиялық әдістерді ғана емес, арт-терапияны да қолданамын. Көпшілік бұл әдісті балалармен немесе шығармашылық бағыттағы терапия деп санайды, бірақ ол әскери ортада да тиімді. Арт-терапия арқылы адамдар өз сезімдерін сөзбен емес, бейнелеу, сурет салу немесе басқа шығармашылық тәсілдер арқылы білдіре алады. Бұл әдіс әсіресе мазасыздықты төмендетуге, өз-өзіне деген сенімділікті арттыруға және ішкі күйзелісті жеңілдетуге көмектеседі.

Сонымен, КазҰУ маған тек теориялық білім ғана емес, осындай маңызды дағдыларды дамытуға мүмкіндік берді. Университеттегі тәжірибелі оқытушылардан алған білімім маған адамдармен жұмыс істеу, олардың эмоциялық жағдайын түсіну және кәсіби маман ретінде қалыптасу жолында үлкен көмек көрсетуде. Практика – бұл теорияны шынайы өмірде қолданудың ең жақсы тәсілі. Сондықтан мен үшін бұл тәжірибе тек оқу процесінің бір бөлігі ғана емес, болашақ мамандығымның іргетасы.

Тленчиева Н.С

педагогика ғылымдарының кандидаты.

Әділша М.Н.

Психология мамандығының 4-курс студенті

әл-Фараби атындағы ҚазҰУ.

Адилова Э.Т

Доцент м.а