Қош бол құтты әліппем тәрбие сағаты 1 сыныпқа

Сабақтың тақырыбы: Қош бол, құтты Әліппе!

Сабақтың мақсаты: 1. оқушыларға алған білімдері барлық білім-ілімнің бастамасы екенін түсіндіру, білімнің адам өміріндегі маңызын ұғындыру;

2. ата-аналарымен бірге мерекелік көңіл-күй арқылы оқуға, білімге деген қызығушылығын арттыру; 3. адамгершілікке, әдептілікке, ана тілін қастерлеуге, Отанын, мектебін, ұстаздарын, ата-аналарын құрметтеуге тәрбиелеу.

Сабақтың көрнекілігі: «Қош бол, құтты Әліппе!» тақырыбы, шарлар, Әліппе, Ана тілі, Математика оқулықтарының макеттері.

Сабақтың барысы

Жүргізуші: Армысыздар, құрметті ата-аналар, ұстаздар және оқушылар!

Бүгінгі «Қош бол, құтты Әліппе!» атты мерекелік кешімізге қош келдіңіздер.

Кеше ғана мектеп табалдырығын аттаған оқушылар бүгінгі күні 42 әріптің қыр-сырын меңгеріп Әліппе оқулығымен қоштасқалы отыр.

Толқимыз, толқып тұрсыз баршаңыз да,

Мұндай күй болған сірә қаншаңызда.

Қол соғып қошеметтеп шақырайық,

1 «В» сыныбын ортамызға!

Үйретеді жалықпастан өнеге,

Отырғызып Білім атты кемеге.

Теңіздейін тереңінен батырып,

Оқушысын көтереді төбеге – деп, 1 «В» сынып жетекшісі Борашова Жамиланы шәкірттерімен бірге ортаға шақырамыз. (әуен ойнап тұрады)

Қазақстан Республикасының Мемлекеттік Әнұраны орындалады.

Мұғалім: Құрметті ата-аналар, ұстаздар және оқушылар! Бүгінгі «Қош бол, құтты Әліппе!» атты мерекемізге қош келдіңіздер. Осыдан 4 ай бұрын мектеп табалдырығын қысыла да, қызыға аттаған, бірі отбасының тұңғышы, бірі кенжесі, бірі әзірге жалғызы, ата-әжесінің сүйікті де, еркесі болып жүрген ұл-қыздарымыз өздерінің ең алғашқы оқулығы болған Әліппемен қоштасқалы отыр. Әліппе - қасиетті, қадірлі оқулық. Бұл кітап бүкіл ғылым дүниесінің алғашқы есігі, білімге бастайтын алғашқы соқпақ. Олай болса, бүгін 1 «В» сынып оқушылары сіздерге Әліппені қалай меңгергендігін, математика пәнінен есепті қалай шығара алатындығын және өз өнерлерін ортаға салып көрсетпек. Ендеше, мерекемізге ортақ болыңыздар.

Бұл мектепті көркейтер әрі қарай,

Нұсқауымен жүретін апай - ағай.

Директор Болат Досов ағайымыз,

Белестерге жеткізер әлі талай, - дей келе алғашқы сөз кезегін мектебіміздің директорына береміз.

Мұғалім: Өзгеріп жатыр бүгін дала, қырым,

Құп алып қазағымның даналығын.

Бет алып болашаққа бара жатыр,

Аяулы алты жасар балаларым.

Ендеше, кезекті 1 «В» сынып оқушыларының Әліппеге арналған тақпақтарына берейік.

Ақбота: «А» дегенің ана ғой,

Ана деген дана ғой.

Айберген: Әжем әнге басады,

Әтеш ұйқы ашады.

Еркебұлан: Б дегенің бала ғой,

Жұмсаса анаң бара ғой.

Ақтоты: Гу деп алғаш бөбектер,

Гуілдейді ақырын.

Айдар: Ғалым, ғылым, ғасырды,

« Ғ» білімге асырды.

Нұршаттық: Елге есті ер керек,

Ер жет өсіп ертерек.

Жасмина: Жыр алыбы - Жамбыл ата,

Ардақтайды оны бала.

Жұлдызай: Зауза ұшады зыңылдап,

Зымыранша зуылдап.

Бекболат: Игі істе батыр болам,

Игілікке жақын болам.

Мерей: Кекілік – ау, кекілік,

Кетіп қалма секіріп.

Мөлдір: Қаламым досым қалмайды,

Қашанда менің қасымда.

Ақбота: Лашын биік самғайды,

Лашын көкті шарлайды.

Нұрғиса: Мектеп берген біліммен,

Марқаямын бүгін мен.

Жансая: «Н» әрпінде екі тіреу,

Ортасында басқыш біреу.

Рысбек: «О» кәдімгі дөңгелек,

Кетпесін ол дөңгелеп.

Нұржан: Өрікте сөздің басындамын,

Бөрікте «Б»-ның қасындамын.

Ермұханбет: Әр үйде бір қақпа бар,

«П» аумаған тап солар.

Дәнекер: Ұстазы жақсының,

Ұстамы жақсы.

Айда: Ізетті бала ізденгіш болады,

Ілгішке киімін тез іліп қояды.

Мұғалім: Өте жақсы балалар. Біз енді ортамызға сүйікті досымыз «Әліппені» шақырайық.

Балалар: Әліппе! Әліппе! Әліппе!

Әліппе: Сәлеметсіздерме, менің сүйікті достарым.

Балалар: Сәлеметсізбе, Әліппе!

Әліппе: Армысыздар, жас достар!

Армысыздар, ата-ана.

Болашаққа жол бастар,

Әліппең келді ортаға.

Айналайын балдырған,

Менен білім алдыңдар!

Әр сөзімді жаттаған

Достарым үшін мақтанам!

Балалар, сендер мені оқыдыңдар, сонда менен не үйрендіңдер?

Балалар: Дыбыстарды танып, буыннан сөз құрауды, сөзден сөйлем құрауды, ана тілімізде дұрыс сөйлеуді үйрендік.

Мұғалім: Әліппе, балалар өзің туралы өлең тақпақ үйренді. Ендеше соны тыңдайық.

Әліппе: Жарайды, тыңдайық.

Ақбота: Әліппе – білім анасы,

Әліппе – кітап данасы.

Әліппе бетін ашпаған

Адамның бар ма баласы?!