Рухани жаңғыру және тәрбие сапасы балабақшаға мақала

«Рухани жаңғыру балабақшада»

«Рухани жаңғыру басы - тәрбие мен оқыту сапасын арттыру».

Елбасының «Болашаққа бағдар: рухани жаңғыру» атты мақаласында көтерілген мәселелер мен ұсынылған бағдарламалар күн өткен сайын жер-жерде талқыланып, түсіндіру жұмыстары жүріп жатқаны белгілі.

Осы мақсатта Зайсан қаласындағы «Еңлік» бөбекжай-бақшасында «Рухани жаңғыру: ұлттық бірегейлікті сақтау бағдарламасын жүзеге асыруда бала тілін дамыту» тақырыбында семинар болып өтті. Қазақ халқының ұлттық тәрбиесі – әлемде теңдесі жоқ тәрбие. Жалпы «ұлттық» деген сөздің астарында елге - жерге, тілімізге, дінімізге деген құрмет жатыр. Ал осы ұлттық тәрбиені бала бойына сіңіруде мектепке дейінгі мекемеде атқарылатын жұмыстың орны ерекше. Яғни тәрбие алуды сәби ана құрсағынан бастаса, оны білім теңізінің балабақша атты кемесінде ұлттық құндылықтарымызбен жетілдіру өте маңызды.

Семинарға аудан балабақшаларының тәрбиешілері мен әдіскерлері және аудандық білім бөлімінің МДҰ әдіскері Ж.Құрмашова қатысты.

Семинар бөбекжай-бақша меңгерушісі А.Досбаеваның алғы сөзімен басталды. Семинарға қатысушы қонақтармен балабақша психологы Н.Акишева танысу тренингін жүргізіп, келген қонақтарға жылулық сыйлады. Балабақша әдіскері «Рухани жаңғыру» бағдарламасы аясында балабақшада өтілетін іс-шаралар жоспарымен таныстырып өтті.

Семинардың практикалық бөлімінде ұйымдастырылған оқу қызметтерінен педагогтарымыз М.Дүтбаева, А.Бекшойнова, Т.Дүтбаева мен А.Садыковалар өз іс-тәжірибелерімен бөлісті. Практикалық бөлім соңында педагогтар жүргізілген оқу қызметтеріне өзіндік талдау жасап өтті. Семинардың соңында қатысушылар семинардан алған әсерлерімен бөлісіп, тілектерін білдірді. Аудандық білім бөлімінің мектепке дейінгі ұйым әдіскері Жанар Құрмашова семинарға қорытынды жасап, ұйымдастырылуына «жоғары» деген бағасын беріп өтті.