Шынайы көшбасшы тақырыбындағы өзіндік ой толғау

ОҚО, Қазығұрт ауданы, «Комсомол» жом

«өзін-өзі тану» пәнінің мұғалімі

Акжолова Балнур Куандыковна

«Шынайы көшбасшы » атты тақырыпта жазылған ой толғау.

«Өрлеу» біліктілігін арттыру ұлттық орталығы» акционерлік қоғамының филиалы Оңтүстік Қазақстан облысы бойынша педагогикалық қызметкерлердің біліктілігін арттыру институтына «Сабақтағы жалпыадамзаттық құндылықтар» ұзақ мерзімді курсына өзін-өзі тану пәнінен оқуға келдім. Бұл курстан үйренгенім, түйгенім өте көп болды. Курс барысында тренер Аскарова Айжамал апай көшбасшы тақырыбын түсіндіріп өтті. Мен көшбасшы тек ғұламалар, ақындар деп түсінетінмін. «Шынайы көшбасшы» тақырыбына эссе жазу тапсырылғанда тұңғиық терең ойға берілдім.

Шынай көшбасшы - ол кім?

Оның бойында қандай адами қасиет, құндылық болады?-деген сұрақ ойымды сан алуан түрлендірді. Кемеңгер Абай атамыз:

«Терең ойдың түбінде теңізі бар,

Тесіле көп қарасаң көңіл ұғар»- деген өлең жолдарын оқи келе жауап таптым.

Көшбасшы - ішкі жан дүниесі бай және ерекше зейіні адамдарға әсер етеді және адамның көркем мінезі негізінде құралатынына көз жеткіздім. Ойлана келе отбысымыздың ұйытқысы болып отырған қайнағам Мамаев Бақтияр Сапарәліұлы деген тоқтамға келдім.

Ол кісі Қазығұрт ауданының құрметті азаматы, қазіргі таңда халқы үшін еңбек етіп отырған Сайрам ауданының Әкімі. Оның бойында ақылдылық, қажырлылық, ұйымдастырушылық, жауапкершілік, іскерлік т.б. қасиеттер мен қабілеттері басым. Айналасына деген ықыласы, сүйіспеншілігі, сыйластығы ерекше. Әр кез барлық адамдарға, туысқан, бауырларға қолдау көрсетіп, қол ұшын созып жүреді. Осы уақытқа дейін халықтың қамын ойлап, оларды өмір деген кемеге жөнді бағыттап, мынау кірпіш дүниеге кетігін тауып қалануға көмектескен адам. Тек қана бағыттап қана қоймай, оларды артынан еріткісі келеді.

Бойынан саяси қайраткерге лайықты адами қасиет, құндылықтарды да көруге болады. Ол кісі қоғам, ұйым алдында мақсат-мүддесін толық сезініп, қорғай біледі. Көшбасшы ретінде адамдарды шабыттандырып, жандандырады, мақсатқа жетуде болашақты көру қасиеті арқылы адамдарды қоғам алдындағы ортақ мақсатқа жетелейді. Сол мақсатқа жету үшін қаланың, аймақтың, мемлекеттің көлемінде адамдардың күш-жігерін біріктіріп, белсенді ықпал ете алады. Дұрыс әрекет құндылығы негізінде күйзеліс мінез-құлықты қалыптастырмай, ерік-жігерін өзіне бағындыра біледі.