Тәуелсіздік біздің тәу етер құндылығымыз мақаласы

Тәуелсіздік — тәу етер құндылығымыз

Жаңа жыл бастала салысымен елімізде орын алған аласапыран жағдайлар әрқайсымызға жай күнде бағалана бермейтін бейбітшілік пен тыныштықтың қадірін терең ұғындырды. Күні кеше егемендігіміздің отыз жылдығын тойлап, бөркімізді аспанға атқанмен, барыс жылы тәуелсіздік көздің қарашығындай қастерлеп, қорғамасақ басымыздан кез-келген уақытта ұшып кетуі мүмкін бақ екенін көрсетті. Біз, Қазақстан халқы, бабалар қанымен келген азаттықтың әр күнін ғасырларға жалғастыруға міндеттіміз. Осынау ұлы мақсатқа алаңда жүріп емес, алаңсыз бейбіт күнде берекелі еңбек етіп қана жете аламыз.

Қазақ тілі мен әдебиеті пәнінің ұстазы ретінде мен де алдымдағы әр шәкірттің жүрегіне мемлекеттік тіліміз бен бай әдебиетіміз арқылы Отанға деген махаббат дәнін еге аламын. Қазақ қазақ болып қара шаңырақ тігіп, ел болып еңсе тіктегелі бері азаттық тақырыбы халықтың жан айқайын жеткізер ақын-жыршының аузынан түскен жоқ. «Күлтегін» жырынан күні бүгінге дейін әдебиет елдің рухын асқақтатып, ұрпағын тәрбиелейтін құрал қызметін атқарып келеді. Өз сабақтарымда мен де шәкірттердің бойына отаншылдық рухты сіңіруге тырысамын. Балалар әдеби шығармалар арқылы өткен заманның жағдайын жандарына жақын қабылдайды, осылайша олар халқының тарихы мен өздерінің арасында нәзік рухани байланыс орнатып, өздерін алып тұлғалардың заңды жалғасы сезінеді. Әдеби кейіпкерлер арқылы жас ұрпақ өзіне «рөлдік модель» таңдайды, яғни ұл балалардың көпшілігі Алпамыс, Қобыланды, Махамбет сияқты ел қорғайтын батыр болғысы келсе, қыз балалар Қыз Жібектей көркем, Сарадай өнерлі, Мәншүк пен Әлиядай ержүрек болуды қалайды.

Қазақ әдебиетінде тәуелсіздік ұғымының терең талқыланып, ұлттық деңгейде жүйелі жүргізілген тұсы Алаш қайраткерлерінің кезеңі болды. Алаш қозғалысының арда азаматтары азаттық жолында құрбан болғанымен, кейінгіге өлшеусіз мұра мен өшпес үлгі қалдырды. Олардың әрқайсысы бойдағы қабілетін ел игілігі үшін сарқа жұмсады. Абайдан бастау алған ағартушылық дәстүр алаш тұлғаларының еңбегінде айқын көрінеді.«Оян, қазақ» деген ұран бодандық құрсауында жатқан елдің жан-жұлынын тірілтті. Тарихымыздың бұл тұсынан бүгінге алар сабағымыз, біз тәуелсіз елде тіршілік етуді қаласақ, білім-ғылым жолына түсуіміз қажет, санасы сергек, көзі ашық халық қана дамыған елдермен терезесі теңеледі.

Отанды сүю дегеніміз тек жалаң сөзбен жеткізуге келмейтін дүние. Оқушыламен «туған жерді сүю деген не?» деген тақырыпта тәрбие сағатын жүргізген кезде, шәкірттер балалық шыншылдықпен риясыз ойларымен бөлісті. Жас буын туған жерге арналған махаббатты білімді, сауатты болумен,…