Тәуелсіздік елімнің еркіндігі туралы шығарма

Тәуелсіздік - елімнің еркіндігі

1991 жылдың 16 желтоқсанында ел тәуелсіздігі жарияланды. Тәуелсіздігімізді Түркиядан бастап, әлемнің 100-ден астам мемлекеті мойындады. Түркияның мойындауынан кейін 1991 жылдың аяғына дейін АҚШ, Қытай, Ұлыбритания, Иран сияқты, жалпы саны 19 мемлекет Қазақстанды дербес ел ретінде мойындап, бізбен дипломатиялық қатынастар орната бастады. Тағы да бір жыл өткенше тәуелсіздігімізді таныған мемлекеттердің саны 108-ге жетіп, солардың 70-імен дипломатиялық қарым-қатынас орнатылса, 21-і Қазақстанда елшіліктерін ашып үлгерді. Сондай-ақ, аталмыш кезеңде елімізге 20 шетелдік мемлекет және үкімет басшылардың ресми және жұмыс бабындағы сапарлары өтті.

Тәуелсіздікке қол жеткізуде, елімізді нарықтық қатынастың ауыр қыспағынан алып шығып, 140-тан астам ұлттар мен ұлыстардың басын біріктіріп, елімізде татулық пен бірліктің берік іргесін қалауда Елбасының еңбегі ұшан-теңіз.

Мемлекет басшысы тарихымызды танып, қастерлеу, дәріптеу қағидаға айналу керектігін қаперімізге салды. – Біз қастерлі Тәуелсіздіктің елу жылдығына қадам басамыз. Бұл – баршамызға ортақ өнегелі өлшем, тағылымды кезең. Жаңа мемлекет құруға атсалысқан бүкіл халқымыздың ерен еңбегінің тарихи шежіресі. Бұл өткенге көз жүгіртіп, қорытынды жасайтын уақыт. Халқымыз үшін осы маңызды датаны нақты істермен және жаңа жобалармен қарсы аламыз, – дейді Қасым-Жомарт Тоқаев Кемелұлы маңызды мақаласында. Жетісу өлкесіндегі білім беруді дамыту оқу-әдістемелік орталығы да тәуелсіздік тұғырының биік шыңына жетелейтін оқиғаларға толы тарих беттеріне шолу жасаған болатын.

Тәуелсіздікке барар қиын жолдардағы сансыз көп шайқастар мен көтерілістерде қаншама қаһарман бабаларымыз шейіт болды. Оларды еске алу, құрметтеу – біздің парызымыз. Сондықтан біз жаңа заманда қантөгіске жол бермей, қасиетті киеміз – тәуелсіздікке сабыр мен төзімділік, ақыл мен парасат арқылы қол жеткіздік.

Маңғыстау облысы, Ақтау қаласы,

Ақтау қаласының медициналық колледжінің

2-курс студенті Бауыржанұлы Дамир