Тәуелсіздік жылдарындағы жетістіктер эссе 4 сынып

Тәуелсіздік жылдарындағы жетістіктер

Рашева Г.Т.

Ғабиден Мұстафин атындағы №83 жалпы білім беретін орта мектеп Қарағанды облысы, Қарағанды қаласы

[email protected]

Тәуелсіздікке жетер жол қай кезде де, қай елде де жеңіл болмаған. Ащы менен тұщыны татқан білер, жақсы менен жаманды жортқан білер дегендей мемлекет құрудың қаншалықты күрделі, қаншалықты қиын екенін оның басы-қасында жүргендер ғана сезіне алатын болса керек. Осы орайда тәуелсіздікке қол жеткізу жолы – ұлы жол десек, артық айтқандық болмайды.

16 желтоқсан – Қазақстан Республикасының Тәуелсіздік күні. Бұл – теңдесі жоқ тарихи күн, Ұлттық мереке. Бұл кешегі бабалардан қалған жәдігер сөз. Қазақстан өз тәуелсіздігін жариялағаннан кейін ел дамуында жаңа тарихи кезең басталды. Бейбітшілік пен келісім, саяси тұрақтылық пен экономикалық өрлеу жүйесі қалыптасты. Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевтың дана басшылығымен егемен еліміз әлем қауымдастығынан лайықты орын иеленді. Аз ғана уақыттың ішінде Қазақстанның әлеуметтік – экономикалық әл – ауқаты, мәдени, рухани келбеті бұрын болып көрмеген биік деңгейге көтерілді.

Тарих ауқымында 27 жыл – қас–қағым сәт. Алайда, елімізде қысқа мерзімде жүздеген жылдарға пара – пар қадамдар жасалды. Тәуелсіздіктің өткен осы жылдар белесінде мемлекетіміз талай қиындықтарды еңсеріп, биік асуларды бағындырды, Қазақстан деген мемлекетті, қазақ деген елді бүкіл дүние жүзі таныды. Еліміздің осындай биіктерді бағындыруына, әлеуметтік – экономикалық дамуына жұмыла біріктірген ынтымағымыздың арқасында қол жеткізіп отырмыз. Біз көп ұлтты мемлекетпіз, дегенмен соған қарамастан бір шаңырақ астында тату – тәтті өмір сүріп келеміз. Бұның барлығы – ауызбіршіліктің арқасы.

Тәуелсіздік жылдары ел бірлігі нығайып, халқымыздың бейбітшілік аясындағы тұрмысы жақсарып, әлемдегі озық отыз ел қатарына қосылуға ұмтылудамыз. Өткен 26 жыл Қазақстан Республикасының мемлекет ретінде қалыптасу, нығаю кезеңі болды. Күннен – күнге жер – жаһан да, қоғамдық үдерістер де, адамзат баласының сана – сезімі де тез өзгеріп, жаңа сапаға ие болуда. Осыған орай биылғы жылы Мемлекет басшысының «Болашаққа бағдар: рухани жаңғыру» атты бағдарламалық мақаласы жарық көрген болатын. Мұнда бұқаралық сананы қалай өзгерту туралы егжей – тегжейлі жазылған.

Енді осы кезеңге дейінгі жеткен жетістігімізге шолу жасасақ. Қазақ халқы 1990 жылдың 25 қазанында Егемендік туралы Декларация қабылдады, одан әрі 1991 жылы 16 желтоқсан күні Тәуелсіздігін жариялап, заң жүзінде шынайы бостандыққа жеттік. Жетпіс жыл бойы үстемдік еткен кеңестік қоғамның күйреу кезеңіне тап болған біздің ел көптеген қиыншылықтарға тап болды. Бір қуанарлығы бабаларымыз айтқандай: «күннің жаманы кетті»… «Мен ауызбіршіліктен айнымайтын ақжүрек жұртымның қуатты ұлтқа, шуақты ұлысқа айналарына кәміл сенемін» (Президенттің Қазақстан халқына Жолдауынан) дейтін Елбасы аманатының жүзеге асып жатқанына баршамыз куәміз. Қазақ халқының алдында мәңгілік мұраттар мен ұлы міндеттер бар, соның бірі, ең бастысы – бостандықты баянды ету, сақтап қалу, одан әрі нығайту.

Н. Назарбаев қол қойған алғашқы Жарлықтарының бірі — 1991 жылғы тамыздың 29-ындағы «Семей полигонын жабу туралы» Жарлық болды. Елбасының осы тарихи шешімі, батыл қадамы бүгінде дүние жүзіне мәлім тарихи фактіге және біздің ұлттық мақтанышымыздың мәніне айналды.

Ең алдымен, қол жеткен жетістік бостандық жайында бірер сөз. Тәуелсіздікке қол жеткен халықтың бостандығын айғақтайтын қасиетті Ата Заңымыз бар. Одан әрі мемлекет екенімізді әлемге танытатын елтаңба, ту, әнұран бар. Қаншама ғасырлар бойы білектің күші, найзаның ұшымен қорғаған жерімізді, шекарамызды түгелге жуық белгіледік, бұл да ең қымбат бостандықтың басты сипаты. Экономикалық өрлеу үстіндеміз, құрсақ тойып, киім бүтінделіп, мәшине мініп, жекеменшік иесі, жер иесі болып шыққан халық бостандықтың тәтті жемісін көруде. Білім – ғылымда да бостандық исі аңқып тұр, күні кеше ғана (1990 жылдары) екі ғана университет болса, енді екі институт табу қиын, білімді толығымен университет, академия дәрежесіне жеткіздік, бостандық емей немене, теңіздің ар жағында «Болашақ» степендиясымен жастарымызды оқытып жатырмыз. Республика бойынша 100 мектеп, 100 балабақша бағдарламасын қабылдап, бірнеше мектептер мен балабақшалар ашылды. Білім туралы айтқанда тілді де ұмытпайық, «Қазақ тілі – Қазақстан Республикасының мемлекеттік тілі», бұл да есіктегі тілімізді төрге шығарудағы игілікті қадам, тіл бостандығына қамқор болатын Ата Заңның бір бабы бар. Бостандықтың ең үлкен жетістігі – енді өз байлығымызға

Бүгінгі таңда бүкіл халық болып сыйлаған Елбасымыз, Парламентіміз бар, Үкімет, Сенат, әкім – бәрі де өз билігімізде, өз билеушілеріміз, өз қолымыз өз аузымызға жетті. Билік – халықтың қамын ойлап, халық билік басындағыларға қолдау көрсетіп тәуелсіз, азат ел екенімізді дәлелдеп келеміз. Онға жуық партия бар, «алуан – алуан жүйрік бар, әліне қарай шабады»…