Төрт түлік мал тақырыбындағы ашық сабақ

Сабақтың тақырыбы: Төрт түлік

Мақсаты: Төрт түлік туралы өлең, жыр, жұмбақ, жаңылтпаш, мақал – мәтел, мәтіндер оқыту, танымын кеңейту. Еңбекқорлыққа, іскерлікке, шеберлікке тәрбиелеу.

Көрнекілік: төрт түлік туралы қима қағаздар, суреттер, ойыншықтар т. б.

Сабақтың барысы: Ұйымдастыру кезеңі.

Біздің халқымыз төрт түлік туралы жұмбақтарға бай болып келеді. Балалар төрт түлік туралы білетіндерін естеріне түсіріп отырып, жұмбақтарды шешу.

Кішкене ғана бойы бар,

Айналдырып киген тоны бар. ( қой)

Екі айнасы бар,

Екі найзасы бар. ( сиыр)

Қамыс құлақ, тостаған тұяқ,

Мінсең қанат, сүті дәрі, еті тамақ. ( жылқы)

Басында таяғы бар,

Төрт аяғы бар.

Екі құлағы бар,

Иегінде сақалы бар. ( ешкі)

Осындай халық мақалдары әр малдың түр – тұрпатын сипаттап көрсетеді.

II. Мал төлдері туралы түсінік беру.

Оқушыларға мал төлдері бейнеленген суреттер немесе ойыншықтар көрсетіп, содан соң мал төлдерінің атын атап, әр төлді суреттегі енесінің қасына апарып қояды.

III. Мал төлдерінің аттары.

Түйе төлі – бота

Жылқы төлі – құлын

Сиыр төлі – бұзау

Қой төлі – қозы

Ешкі төлі – лақ

IV. Малдардың төлдеуі. Әр түліктің төлдеуіне байланысты айтылатын сөздер болады. Оған байланысты сөздерді дұрыс айтуымыз керек. Малдың төлдеуі: түйе – боталайды, жылқы –құлындайды, сиыр – бұзаулайды, қой – қоздайды, ешкі – лақтайды деп айтамыз.

-Балалар, малдардың төлдеуін немен байланысты айттық?

-Мал төлдерінің аттарымен байланыстырып айтамыз.

V. Малдардың дыбыс шығаруы.

-Әр малдың дыбыс шығаруы нақтылы сөзбен айтылады. Түйе – боздайды, жылқы – кісінейді, сиыр – мөңірейді, қой – маңырайды, ешкі – бақырады. Балалар өздері дыбыстап айтып көреді.

VI. Түлік сыры. Топпен жұмыс.

Оқушыларға қима қағаздарға сөйлемдер тобы таратылып беріледі. Топтағы оқушылар сөйлемдерді талдап, оның қай түлікке тән екенін табады. Сөйтіп, тақырыптық мәтін құралады.

Түйе. Төрт түліктің төресі – түйе. Оның еті тамақ, шұбаты – сусын, жүні – киім. Түйе – таптырмас көлік. Ол шөлге өте төзімді.