Туған жерге туыңды тік тақырыбындағы эссе

ТУҒАН ЖЕРГЕ ТУЫҢДЫ ТІК!

Адам жүрексіз өмір сүре алмайтыны сияқты,

Отансыз да өмір сүре алмайды.

К.Г.Паустовский

Әрбір адамның өмірі отбасыдан, киелі шаңырақтан, өмір жолымыз басталатын бұрыштан басталады. Мұның бәрі біздің кішкентай Отанымыз. Менің ойымша әр адамға Отан мен Туған жер туралы түсінік бір-бірінен ажырамас негізгі адами құндылықтар деп есептеймін. Өзімнің осы уақытқа дейін түсінгенім: қанша жыл өтсе де, Отан десе біз өзіміздің жан дүниеміздегі жылулық пен жүрегіміздегі тебіреніспен оны еске түсіреміз.

“Бөлінгенді бөрі жейді” демекші мен бір елдің ішінде тұрып, “Мен батыстанмын” не “шығыстанмын”, “Мен солтүстіктен” не “оңтүстіктенмін” деп бөлінгендерді түсінбеймін. Себебі олар алып державалар жиналған әлемдік аренада Қазақстанның көк байрағын көтеріп жүр емес пе?!

Біздің Отанымыз – Қазақстан! Себебі менің ата-бабамыздың тарихы осы елдің тарихымен пара-пар жалғасып келуде. Мен осы еліміздің солтүстігінде орналасқан Екібастұз қаласында туылдым және сол жерде өстім. Қазір еліміздің оңтүстігінде орналасқан Тараз қаласында білім алудамын, ата-анамның ыстық лебізіне бөленіп, олардың қуанышына өсіп келемін.

Мен өз елімнің болашағы үшін өзімдегі барлық қырларымды дамытудамын. Болашақта, Қазақстан елінің атынан шыққан, әлемге әйгілі архитекторы болатынымды мақсат еттім. Еліміздің әрбір қаласын жандандырып, адамдардың көзі тоймайтын шаһарларға айналдырғым келеді. Бұл әрине менің арманым, бірақ әрбір қадам жасағаннан кейін менің арманымнан өз мақсатым айқындалатынын көріп отырмын. Өз ісіме қарап бұл жерде қазақтың “Бұлақ көрсең көзін аш” деген дана сөзі де есіме түсіп кетті. Тек осымен ғана тоқтап қоймай, елімізде өз ісіне шебер, білікті архитекторлар дайындайтын оқу орнын ашып, еліміздегі мен секілді арман қуған баланың мақсатының орындалуына бастау болғым келеді.

Қорытындылай кетсем, әрбір азамат өз елінің нық қаланған кірпіші болу керек екені міндетті. Ол үшін адам өзіне «Мемлекет маған не береді?» емес, «Мен мемлекетке не бере аламын?» деген сұраққа жауап іздеу керек. Сол кезде ғана мемлекетіміз көркейеді. Көркейген мемлекетімізді ауызбіршілігіміздің арқасында берік сақтаймыз. «Төртеу түгел болса, төбедегі келеді, алтау ала болса, ауыздағы кетеді» деген ата сөзін де ұмытпаған жөн.

Жамбыл облысы, Тараз қаласы,