ҰБТ қорқыныш па, мүмкіндік пе сұхбат мақала

ҰБТ – қорқыныш па, мүмкіндік пе?

Маусым – мыңдаған түлек үшін ең жауапты әрі толқынысқа толы кезең. Бұл айда бүкіл елдің назары ҰБТ-ға ауатыны сөзсіз. Кей оқушылар үшін бұл – үлкен мүмкіндік, ал енді біреулер үшін психологиялық сынақ. Осы тақырып төңірегінде өзімнің сыныптасым, 11-сынып түлегі Ақеркемен сұхбаттасқан едім.

– Ақерке, сен үшін ҰБТ деген не?

– ҰБТ – мектепте алған білімнің ғана емес, төзім мен табандылықтың да сынағы. Бұл тек бір емтихан емес, болашаққа бастар жол. ҰБТ арқылы кім болғың келетінін нақтылайсың, өз қабілетіңді бағалайсың.

– Қазіргі көңіл күйің қалай? Қобалжу бар ма?

– Иә, қобалжу бар, себебі бұл өмірімдегі ең маңызды кезеңдердің бірі. Дегенмен, уайымнан гөрі сенім басым. Өйткені дайындық бар, еңбек бар. Енді тек өзіңді жинақтап, дұрыс пайдалансаң болғаны.

– ҰБТ-ға қалай дайындалып жатырсың?

– Күн сайын жоспармен жұмыс істеймін. Әр пәнге уақыт бөліп, сынақ нұсқаларын жиі орындаймын. Мақсат қойып, өзіме сенім арту – дайындықтың басты тірегі деп білемін. Психологиялық дайындық та маңызды: өзіңді сабырға шақырып отыру керек.

– Болашақта қандай мамандық иесі болғың келеді?

– Мен заң саласына қызығамын. Адам құқығын қорғау, әділдікті қалпына келтіру – мен үшін аса маңызды құндылықтар. Сол үшін заңгер болуды армандаймын. Қазір елімізге білімді, адал, принципті юристер керек деп ойлаймын.

– ҰБТ-ны қорқыныш деушілерге не айтқың келеді?

– Меніңше, бәрі адамның көзқарасына байланысты. Егер оны тек қорқыныш деп қабылдасаң, ол шынымен де қиын болады. Ал егер оны бір саты, бір мүмкіндік деп қабылдасаң – жеңілдеу. ҰБТ – өмірдің соңы емес, тек бір кезеңі ғана.

– Сыныптастарыңа немесе келер жылғы түлектерге қандай кеңес берер едің?

– Біріншіден, өз-өзіңе сеніңдер! Екіншіден, уайымға берілмей, жүйелі дайындалу керек. Үшіншіден, арманнан бас тартпаңдар! ҰБТ – арманға апарар көпір. Ол көпірден сенімді түрде өту – әркімнің қолынан келеді.

– Ақерке, шынайы пікірің мен уақыт бөлгеніңе үлкен рақмет! Саған алдағы ҰБТ-да сәттілік тілеймін! Арманың орындалып, заң саласындағы жолың жарқын…