Ұлттық құндылықтар мен заманауи оқыту әдістері, бастауыш сынып

Ақтөбе қаласы №51 гимназияның бастауыш сынып мұғалімі

Медеуова Улболсын Доскайровна

Бастауыш сынып оқушыларын ұлттық құндылықтарға бағыттай отырып, заманауи оқыту әдістерін қолдану

Бүгінгі жаһандану дәуірінде ұрпақ тәрбиесі мен білім беру мәселесі өзектілігін арттырып отыр. Әсіресе бастауыш сынып кезеңі — баланың дүниетанымы мен мінез-құлқының қалыптасуындағы алғашқы әрі маңызды баспалдақ. Бұл кезеңде оқушыға берілетін білім мен тәрбие мазмұны терең әрі мазмұнды болуға тиіс. Осындай маңызды сәтте ұлттық құндылықтарды ұрпақ санасына сіңіру — мұғалімнің кәсіби парызы.

Ұлттық құндылықтар — халықтың ғасырлар бойы қалыптастырған рухани, мәдени мұрасы. Олар оқушы бойында адамгершілік, отансүйгіштік, еңбекқорлық, имандылық, үлкенге құрмет, кішіге ізет секілді қасиеттерді дамытады. Ал бұл қасиеттерді заман талабына сай беру үшін педагог заманауи әдіс-тәсілдерді шебер пайдалана білуі қажет.

Мәселен, білім беру процесінде ақпараттық-коммуникациялық технологияларды (АКТ) қолдану арқылы оқушының зерттеушілік қабілетін дамытып, ұлттық мазмұндағы бейнероликтер мен танымдық материалдарды көрсетуге болады. «Флипчарт», «Көрнекі кластер», «Интерактивті тапсырма», «QR-код арқылы тапсырма шешу», «Padlet», «Wordwall», «Kahoot» платформалары арқылы оқушы белсенділігі артып, ұлттық мазмұн жеңіл әрі қызықты түрде меңгеріледі.

Сонымен қатар, білім беру үрдісінде жобалық жұмыстарды ұйымдастыру – оқушылардың шығармашылық қабілетін дамытуға мүмкіндік береді. Мысалы, «Менің отбасымның шежіресі», «Ұлттық тағамдар», «Ұлттық ойындар» тақырыптарында шағын зерттеу жұмыстарын ұйымдастыру арқылы балалар тек ақпарат жинап қана қоймай, ата-анасымен, ата-әжесімен байланыс жасап, ұлттық болмысты отбасылық деңгейде танып-білуге ұмтылады.

Ойын әдістері арқылы оқыту да бастауыш сынып оқушыларына өте тиімді. Ұлттық ойындар баланың ойлау, есте сақтау қабілетін арттырып, сонымен қатар ұлттық мәдениетті құрметтеуге үйретеді. Мысалы, «Тақия тастамақ», «Сақина салу», «Арқан тарту» секілді ойындарды сергіту сәтінде ғана емес, пәндік мақсатта да қолдануға болады.

Бастауыш сыныпта оқушылардың шығармашылық әлеуетін ашу, өз ойын еркін жеткізу, өз мәдениетін құрметтеу дағдыларын дамыту – ұлттық құндылықтар мен заманауи педагогикалық әдістердің үйлесімділігінде жүзеге асады. Осы тұрғыда мұғалім үнемі ізденіс үстінде болып, жаңашыл көзқарастағы тәсілдерді тиімді пайдалануы тиіс. Бұл – келешек ұрпақтың рухани бай, білімді, парасатты болуына негіз болады.