Ұстаз мектептің жүрегі туралы эссе 7 сыныпқа

Қарағанды облысы, Жезқазған қаласы

«№11 жалпы орта білім беретін мектебі» КММ-нің

денсаулығына байланысты үйден оқитын 7 «А» сынып оқушы

Бақтыгелді Бірғаным Сұлтанқызы

Ұстаз- мектептің жүрегі

Менің түсінігімдегі ұстаз – рухы таза, ой-өрісі биік, ұлты мен Отанының болашағы үшін тер төгіп, шыдамдылық пен табандылықтың үлгісін көрсетуші, өз бойындағы асыл қасиеттері мен білімін болашақ ұрпақтың бақыты мен кәдесіне жаратып, қоғамды өрге өркендетуші, жаңашылдықтың бастаушысы, жүрегі – жылы, көңілі – дарқан адам. Өзім үйден оқып дәріс аламын. Қазіргі таңда 7 сыныпта оқимын. Осыншама оқу жылында пән мұғалімдері үйіме келіп ерінбей сабақ беруде. Әр пән мұғалімі маған үнемі дайындықпен келеді. Қызығушылығымды оятып, сабаққа зейінімді ашты. Аяғымды басып жүре алмағанмен көкірегім ояу, санам білімді жаңартуға, одан әрі дамытуға үнемі талпынып тұрады. Бұл мені оқытқан ұстаздардың еңбегі. Әр оқушыға өз ұстазы артық. Әр оқушының өзінің көңіліне жақын тартатын өз ұстазы болады. Біз оқып жүрген ұстаздарды қарап отырсақ, әрқайсысының оқыту стратегиясы әр түрлі.

Ұстаз білгенін үйрету ғана емес, сонымен қатар, тұла бойы тұнған өнеге, ақ тілеулі ана тәрізді барлық адамның бойынан жақсылық іздейтін ізгі ниет иесі. Шәкірті өзінен озған ұстаз – еңбегі ақталған ұстаз. Өйткені,өмірдің заңы даму, ілгерілеу, озу. Өзінен озған шәкірт тәрбиелейтін шебер ұстаз үздіксіз ізденісте болып, қоғам сұранысына сай білімді, шығармашыл, өзін-өзі дамытып, жетілдіре алатын болуы қажет деп ойлаймын. Біздің дана қазақ халқымызда

«Ұстаздан шәкірт озар» деген сөз бар.

Өмір табиғатпен үндеседі деген шын болса керек. Ұстаз бен шәкірттің арасы бір-бірімен тығыз байланыста болады. Жас шыбықты, үрімдей жеміс ағашын жерге егіп, күнара суарып, баптап, өсірсең жеміс беріп, үлкейіп өседі. Шәкіртінің ұстаздан озып, оның жемісін көру ұстаз үшін үлкен қуаныш пен мәртебе. Дүниенің кезек екенін бәріміз жақсы білеміз. Ұстазынан озған шәкірті бұл ұстаздың берген білімінің жемісі. Ұстаз киелі мамандық. «Ұстаздық еткен жалықпас, үйретуден балаға» деп Абай атамыз айтқандай ұстаз қауымын құрмет тұту біздің парызымыз деп түсінемін.