Үздіксіз даму туралы педагогикалық эссе

«Оралхан Бөкей атындағы №44 лицейі» КММ

Бастауыш сынып мұғалімі

Далаева Назым Турсынгожакызы

«ҮЗДІКСІЗ ДАМУ-МҰҒАЛІМНІҢ ПЕДАГОГИКАЛЫҚ

ШЕБЕРЛІГІНІҢ НЕГІЗІ» (эссе)

Ел дамуының басты белгілері ғылым мен техниканың, экономиканың жетістіктері болса, оның бастауы – білімде, ал, білім беру негізі – мұғалімнің біліктілігі мен біліміне, тәжірибесіне келіп тіреледі. Ол үшін мұғалімнің білімі мен біліктілігі оның педагогикалық шеберлегіне ұштасуы керек. Педагогикалық шеберлік дегеніміз – үнемі жетілдіріп отыруды қажет ететін балаларды оқыту мен тәрбиелеу өнерінің негізі. Ол өнерге балаларды сүйетін және өз қалауымен жұмыс істейтін әрбір ізденімпаз педагогтің қолы жетуі мүмкін. Педагог – өз ісінің шебері, жоғары мәдениетті, өз пәнін терең меңгерген, ғылымның тиісті салаларынан хабардар, әсіресе, балалар психологиясының, жас ерекшеліктерінің мәселелеріне қанық, оқыту мен тәрбиенің әдістемесін жетік меңгерген адам болуы тиіс. Дүниеде адамды тәрбиелеп, азамат атандырғаннан артық абырой мен құрмет жоқ. Сондықтан, да ұстаздың сапасын ең жоғары деңгейге көтеру – уақыт талабы дейміз. Өйткені, келешек ұрпақтың барлығы ұстаз қолынан өтіп, тәлім-тәрбие алады. Ізденімпаз мұғалімнің шығармашылық ерекшелігі – оның сабақты түрлендіріп, қосымша материалдармен байытып, тұлғаның жүрегіне жол таба білуінде.

Менің оқушыларым мектепішілік, қалалық, облыстық олимпиадалар мен облыстық, республикалық халықаралық байқауларда жоғары дәреже көрсетіп, І, ІІ, ІІІ орындарды иеленді. Менің жетекшілігіммен 1-сынып оқушысы Төлеуғазы Зере халықаралық ғылыми жобаға қатысып, «Оқушы таңғы асының құнарлығын анықтау» атты өзекті тақырыпты қозғап, нәтижесінде жүлделі ІІ орынды иеленді. Таңғы астың пайдасы мен зияны жөнінде өз көзқарасы

тұрғысынан тереңнен қарастырып, зерттеуді жалғастыру үстінде. Оқушылардың жетістігі мұғалімді шабыттандыратын ерекше күш болып табылады. Осыған орай менің еңбегімнің жемісі бағаланды деп білемін. Бұл мен үшін үлкен жетістік. Елбасымыздың да ұстаз мәртебесін көтеруіміз қажет деген сөзіне дәлел болады. Жаңалықтың жаршысындай өзіме зерделеп, зерттеп білім басы бастауыштан деген қағиданы басты назарда ұстаймын, оқушыларымның білім сапасын жете қадағалап отырамын. Мен тәрбиелеген оқушылар функционалды сауатты, париоттық рухы жоғары, отандық біліммен сусындаған болашақ ел тізгінін ұстайтын жеке тұлға болып қалыптасатынына сенімім мол.

Осыған сүйене отырып, мен білім беру барысында оқушыларымның функционалдық сауаттылығын дамытуды жолға қойдым. Мұғалім даму жұмысының көшбасшысы екенін ескерсек, менің жұмыс жүйем: жаңа бағдарлы оқытудың барысында алдымда тұрған келесі міндеттердің бірі – оқушылардың өз бетімен ойлауына мүмкіндік жасау. Практикалық білімнің маңыздылығын ашатын әрт түрлі интерактивті және топтық жұмыс түрлерін ұйымдастырамын, оқыту әдістерін өзгерту, үнемі іздене отырып, жаңалықтарды біртіндеп жұмыс жүйеме енгізіп отырамын. Білікті білім беру жағдайында білім, іскерлік, дағдының міндеті өзгереді. Мен сабақтарымды 7 модульді қолданып отырамын. Жұптық, топтық талқылау барысында ұйымдастырушылыққа үйренді, бірін-бірі түзетеді, оқытады. Сыныпта белсенді ашылып өз ойын білдіре қоймайтын оқушылар білек сыбанып, қызу жұмысқа кіріскенде шынымен де өз жұмысыма сырттай рахаттанып, сүйсінетін кездерім болады.

Менің оқушылардың білімін бағалау кезінде қиналып, шешімін таппай жүрген сұрақтарым болатын. Осы сұрақтарымның шешімін тапқандаймын, Неге? Өйткені сабақты критериялды бағалауды жүйелі түрде жүзеге асырып келемін. «Екі жұлдыз, бір тілек» әдісі арқылы бастауыш сынып оқушыларының өз ісіне сын көзбен қарау, сапалы жұмыс жүргізе білуге үйреніп келеді.