Жаңа форматты мұғалім және білім берудегі өзгерістер

Алматы облысы

Панфилов ауданы

Абай атындағы орта мектеп

Ағылшын тілі пәнінің мұғалімі

Байымбетова Айтбүбі Рахымқызы

Жаңа форматты мұғалім

Жылдам дамып келе жатқан заманда осы заманға лайықты тұлға тәрбиелеу - әрбір ұстаздың міндеті. Еркін, шығармашыл, өзін –өзі көрсете алатын, сенімді, ынталы, сандық технологияларда құзырлылық көрсете алатын оқушы тәрбиелеу үшін білім беру мекемелеріндегі ұстаздар да кәсіби дамыған, жаңашыл, өзінің идеяларын басқалармен бөлісе алатын, шығармашыл ұстаз болу керек.

Мектеп жұмысы мен оқушы жетістіктерін өрістетудегі негізгі тұлға- мұғалім (Strong, Ward and Grant, 2011) деп айтқандай мұғалім жұмысы өте күрделі де жауапты.

Елбасы Н.Ә.Назарбаев Қазақстан халқына жолдаған жолдауында басты мақсатымыз-Қазақстанның ең дамыған 30 мемлекеттің қатарына қосылуы, ол-«Мәңгілік Қазақстан» жобасы, ел тарихындағы біз аяқ басатын жаңа дәуірдің кемел келбеті деген. Осы жолдауда «Мәңгілік Қазақстан» жобасында Қазақстан Республикасының әлем елдерімен терезесі тең қатынас құрып, елді дамытатын салалардың бірі-ғылым мен білімге сенім білдірген. Ал оны жүзеге асыратын –жаңа форматтағы мұғалім.

Жаңа форматтағы мұғалім дегеніміз кім?

Жан – жақты дамыған, жаңа технологияны меңгерген, оқушының жан дүниесін түсінетін, кәсіби шеберлігін оқыту мен оқуда қолдана алатын ұстаздарды атауға болады. Қазіргі таңда осындай ұстаз болу үшін елімізде көп мүмкіншіліктер жасалған.

Елбасының қолдауымен «Өрлеу» БАҰО» АҚ филиалы біліктілікті арттыру институтында, Педагогикалық шеберлік орталығында ұйымдастырылған білім жетілдіру курстарын атап айтуға болады. Кембридж университеті ұсынған деңгейлік оқу бағдарламалары , «Тәжірибедегі рефлексия» бағдарламасы, «Мұғалім тәжірибесіндегі зерттеу» мектепішілік кәсіби даму курсының білім беру бағдарламасы, жаңартылған білім беру бағдарламасын жетік меңгерген мұғалім жаңа форматты мұғалім бола алады деп ойлаймын.

Сонымен қатар, қазіргі таңда білім беру мекемелерінде үштілді оқыту да талап етілуде. Осы орайда жаратылыс тану пәні мұғалімдері үшін де тоғыз айлық білім жетілдіру курстары ұйымдастырылған.

Еліміздің бізге жасап жатқан мүмкіншіліктерін пайдалана отырып, кәсіби шеберлігімізді арттырып, сын тұрғысынан ойлай алатын, креативті, ұстанымы жоғары ұстаз болу - жаңа форматты мұғалім міндеті..