Жаңартылған білімдегі инноватор педагогтың рөлі

Елеусизова Зина Ерболатовна

Қызылорда облысы

Арал қаласы №260 орта мектебінің

технология пән мұғалімі

Жаңартылған білім мазмұнына өту

жағдайындағы инноватор педагогтың ролі

ХХІ ғасыр – рухани жаңғыру ғасыры, білім мен ғылымның, ақпараттың дамыған ғасыры. Жаһандану заманы әлемдік білім беру кеңістігіне қанат қаққан еліміздің экономикасына ғана емес, білім беру жүйесіне де өз ықпалын тигізуде. Әлемнің алпауыт елдерімен тереземізді тең ұстаудың, өркениетті елдер қатарына жетудің бір жолысаналы, рухани жан дүниесі бай, функционалды сауатты, тәрбиелі адамдарына да тікелей байланысты.

Қазіргі білім-ғылымның модернизацияланған заманында ұлттық құндылықтарымызды сақтай отырып ұрпақ тәрбиелеу - бүгінгі күннің басты талабы. Елбасымыз Н.Ә.Назарбаевтың халқына Жолдауында атап көрсетілгендей: «Сіздер мен біздер тек болашақ буынды ғана емес, жалпы адамзаттың, қадір-қасиеттердің мән-маңызын түсінетін жаны да, тәні де таза, білімді патриот-азаматтар буынын тәрбиелеуге міндеттіміз,»-дегендей , еліміздің өркениетті елдер қатарынан көрініп, әлемдік кеңістіктен орын алуы рухани жаны таза ұрпағына байланысты. Яғни, болашағымызға ұлттық құндылықтарымызды, ұлттық мәдениетіміз, салт-дәстүрімізді санасына сіңірген, білімі мен білігі мол, адамгершіліктің биік тұғырынан көрінетін ұрпақ керек.

Елбасымыз Н.Ә.Назарбаевтың халқына Жолдауында: «...Біз бүкіл елімізді әлемдік стандарттар деңгейінде сапалы білім беру қызметіне қол жеткізуге тиіспіз,»-деген сөзінде бүгінгі білім беру ісіне, ондағы педагог-қызметкерлерге аса жауапкершілік жүктеп отыр.

Осы орайда «ХХІ ғасырда нені оқыту керек?», «Мұғалімдер оқушыларды қалай дайындайды?» деген өзекті мәселелер көтерілуде. «Заманына қарай адамы» деп халық даналығында айтылғандай, жоғарыдағы аталған мақсат-мүдделер бүгінгі қоғамға жаңа форматты инноватор ұстаздарымыз легін қалыптастыруға негіз болуда. Яғни, жан-жақты дамыған, сындарлы ойлай алатын, функционалды сауатты, рухани жан-дүниесі бай, саналы да тәрбиелі, салауатты жеке тұлғаны баулуда жаңашыл идеяларды меңгерген, кәсіби білікті педагог қажет.

Егер педагогика тарихына үңілсек, осынау киелі жолда қаншама тамаша педагог, психолог ғалымдар, ұлыларымыз із қалдырды. «Маған жақсы мұғалім бәрінен де қымбат, өйткені мұғалім – мектептің жүрегі,»-деп Ы.Алтынсарин киелі мамандыққа айрықша баға берген екен. «Мұғалім – мәңгі нұрдың қызметшісі, ол барлық ой мен қимыл әрекетіне ақылдың дәнін сеуіп, нұр құятын тынымсыз лаулаған жалын иесі,»-деген тамаша педагог Я.А.Коменскийдің де пікірі ұстаздық мамандықтың құдіретін аша түскендей. Адамзаттың ақыл-ойының кеніне айналған Сократтың ұстаздық еңбегі, өз ұлтымыздың мақтаныштары Абай, Ыбырай, Ахмет, Мағжан сынды даналарымыздың педагогика саласында алар орны зор.

Осы орайда ғұмырын ұстаздыққа арнаған «Ұстаздықтың Падишасы», «Ұстаздықтың Хан апасы», «Қазақтың Қанипасы» атанған Қанипа Омарғалиқызының Елбасы Н.Ә.Назарбаевтың алдында тұрып, күллі ұстаздар қауымын дүр сілкінткен сөзін айтпай кету мүмкін емес. «Ұстаздық – киелі жол. Даналық пен ұлылықтың биік шыңы- Әл-Фараби бұл жолда байлықтан безген, төрткүл дүниені табанында илеген Темірдің немересі Ұлықбек хандықтан, биліктен бас тартқан,»-деп ғұмырын туған тіл мен әдебиетіне арнаған Қанипа Омарғалиқызы – бүгінгі ұрпақ үшін үлгілік эталоны.

Әр заманның өзінің буырқанған лебі, өзінің талабы болады.Ал жаңа заман, жаңа қоғамның жаңаша еңбек ететін, жаңа форматты инноватор педагогті талап ететіні заңды нәрсе.

«Мен инноватор педагог атануға лайықтымым ба?» деген сауал ұстаздық мамандықты таңдаған әр ұстаз, педагогті ойландыратын, көкейінде жүретін басты ұстанымдарының бірі болуы тиіс деп санаймын. Өз басым ұстаздық еңбек жолымды саралай келе, өзімді бұл дәрежеге лайықпын деп есептеймін.

«Қазіргі заманға сай білікті мұғалім, инноватор педагог қандай болу керек?»-деген сауалға адамзат ғұламасы-данышпан Абайдың: «Үш-ақ нәрсе адамның қасиеті: жылы жүрек, нұрлы ақыл, ыстық қайрат» деген үнінен жауап тапқандаймын. Бойында осы үш қасиеті бар адам қай қоғамда еңбек етсе де, қоршаған ортасының жаны, жүрегі, ұйтқысы.

Біріншіден, жылы жүрегімді, ыстық қайратымды, нұрлы ақылымды еліме, аяулы тыңдаушыларыма арнаған педагогтардың бірімін деп санаймын. Дәстүрлі оқытудағы «мұғалім-оқушы» іс-әрекетінен арылып, заманауи оқытудағы«оқушы-мұғалім» іс-әрекетіне, яғни оқушының білімді өз іс-әрекетімен, белсенділігімен алуына, оны жүзеге асыруына, алған білімдерін шығармашылық деңгейге жеткізуіне жол ашамын. Сындарлы ойлауға, алған білімдерін кез келген ортада қолдана алуға жол ашамын.