Жол тәртібіне арналған бастауыш тәрбие сағаты

«Жол тәртібін жадыңда ұста, жас ұрпақ !»

Мақсаты: Оқушыларға көше қатынасы ережелерін меңгерту.

І.Ұйымдастыру. Зал шарлармен, көшеде жүруге байланысты стенд, суреттер, нақыл сөздермен безендірілген. Музыка ойнап тұрады.

Мұғалім: Жол ережесін білу өмірімізді сақтайды. Оның сырын біліп, жол ережесін сақтау, орындау баршамыздың басты міндетіміз екендігін ұмытпағанымыз жөн. Көшеде жүру тәртібін орындамау көліктердің жүріп-тұруына кедергі келтіреді, ересектердің жұмысқа, оқушылардың сабаққа, басқа да баратын жерлеріне дер кезінде жете алмауына әкеліп соқтырады. Мектепке келе жатқанда өзіңе қауіпсіз болатын жолмен жүру, көшеде тоқтап тұрған машинаның қасынан абайлап өту керек екенін әркім түсінетін-ақ шығар. «Егер өз өмірлеріңді, денсаулықтарыңды сақтағыларың келсе, әрқашанда жол ережелерін сақтап, бұлжытпай орындауларың керек».

Шуақты өміріміз күндей күліп,

Жүректе бүршік атып гүлдейді үміт.

Арманға сапар тарту мүмкін емес,

Жол жүру ережесін білмей тұрып.

Қай көше, қай қалаға барсаңыз да,

Қай ақыл өлшеміне салсаңыз да.

Жол жүру ережесі заңды тәртіп,

Ол ортақ үлкен-кіші баршамызға.

ІІ. Қызығушылығын ояту.

Сұрақ – жауап.

Балалар көшеде жүру ережесін білу бізге не үшін керек?

Жиекжол деген не?

Жаяуға қай жермен жүруге болмайды?

Көшеде жүру тәртібін кім басқарады?

Бағдаршам туралы не білесіңдер?

Бағдаршам макетін киген оқушы және бағдаршамның үш көзін ұстаған төрт оқушы ортаға шығып, тақпақтар айтады.

Қызыл көзі

Мен көзімді ашқанда,

Ешқашанда баспа алға.

Орныңда тұр қозғалма

Ереже бұл “Сен тоқта!”

Сары көзі

Мен көзімді ашқанда,

Қарап қалма аспанға.

Жүруге әлі болмайды,

Дайындықты сақтайды

Жасыл көзі

Мен көзімді ашқанда,

Көліктер саған тоқтайды.

Ережені білгендер,

Өтуге еш қорықпайды.

Бағдаршам

Жолды кесіп өтерде,

Сол жағыңа қарайла,

Жарты ортаға келгенде

Оң жағыңа қарайла

Білгеніңді басқаға

Үйрете жүр, жарай ма?

ІІІ Топқа бөлу.

Оқушылар бағдаршамның түстеріне сәйкес қызыл, сары, жасыл түстерді таңдап, топқа бөлінеді.

ІV Сайыс кезеңдері.

1 – сайыс Ұран айту

1-топ – «Қызыл» Топтың ұраны: Жол тәртібін білейік, аман- есен жүрейік!

2-топ – «Сары» Топтың ұраны: Үйрен таппай тыным бір, Белгілердің тілін біл!

3-топ -«Жасыл» Топтың ұраны: Тоқта! Сақтан! Жол ашық! Жүрме жолға таласып!

2 – сайыс Блиц — турнир сұрақтары

Интерактивті тақтада әр топқа кезекпен үш сұрақ шығып тұрады. Топ оқушылары үш сұраққа бірден жауап беруі керек.

Қызыл

1.Жаяу жүргіншілер қандай жерлермен жүреді?

2.Жол бойында балалардың ойнауына қатаң тыйым салынған себебі неліктен?

3.Жолды неге тек жол өткелдерінен қиып өтуге тиіспіз?

Сары

1.Жол өткелінен жүгіріп өтуге бола ма?

2.Жол жиегінде тұрған автобус, троллейбус, т.б. көлік түрлерінің қай жағынан өтуге болады?

3.Бағдаршам жарықтарының қызметі қандай?

Жасыл

Велосипедпен неше жастан бастап жолмен жүруге болады?

Бағдаршам қойылған жол өткелі қауіпті ме, әлде бағдаршам қойылмаған жол өткелі қауіпті ме? — Бағдаршам бар көшеде өту оңай. Ал бағдаршамсыз – қауіптірек. Жүргізуші қанша мұқият болғанымен, қанша шапшаң болғанымен, тежегішті қанша күш салып басса да, көлікті тоқтатып үлгеру кейде мүмкін емес.

Жол бойында тоқтап тұрған көлік неліктен қауіпті?

3 – сайыс “ Кім шапшаң?”

Мазайка әдісі: жылдам белгілерді құрайды. Белгі артындағы өлең жолдарын оқиды

А) Ескерту белгісі

Қып-қызыл үшбұрыш

Ескерту белгісі мен болам.

Қауіптен сақ бол деп

Сәт-сапар жолдаған.

Ә) Тыйым салу белгісі

Қызылмен боялған шеңберім аумақты,

Тыйымшыл белгімін, қаталмын, салмақты.

Мен тұрған жерлерде хақың жоқ жүруге

Қауіп бар бағдарла, көз салып жан-жаққа.

Б) Нұсқау белгісі

Баратын жерінің бағыты тұрағым,

Үн-түнсіз жол сілтеп, жол нұсқап тұрамын.

Күндіз де, түнде де от болып жанады,

Көк түске боялған төртбұрыш шырағым.

4 – сайыс «Қай топ жылдам?» ойынын ойнайық! (Белгілердің ішінен аталған белгіні тауып көрсету)

5-сайыс Жұмбақтар:

Көзін ашып жұмады.

Бағыт сілтеп тұрады. (Бағдаршам)

Ала таяқ ұстаған,

Жол тәртібін нұсқаған.

Өміріңді күзеткен,

Ысқырығы күшті адам. (Автоинспекция қызметкері)

Арқаным тым ұзын.

Ала алмайсың бір үзім. (Жол)

Сөйлегенді білмейді

Бірақ «Тоқта, жүр»-дейді. (Бағдаршам)