Жүрек қалауымен 6-сыныпқа арналған тәрбие материалы

«Өзiн-өзi тану» сабағының жоспары

Мектеп З.Серікқалиұлы атындағы мектеп-интернаты

Мерзiмі: 12.03 2020ж. №27 сабақ

Сынып 6 Оқушылар саны 14

Сабақтың тақырыбы: Жүрек қалауымен.

Құндылық: Дұрыс әрекет.

Қасиеттер: мейірімділік, жомарттық, қайырымдылық.

Мақсаты: оқушыларға «жүрек жылуы» ұғымына түсінік бере отырып, Дұрыс әрекет құндылығының мәнін ашу.

Міндеттері:

—оқушыларға адамдар арасындағы ізгі-ықыластардың риясыздығының қадірін ұғындыру;

— айналаға мейірімділік таныту дағдыларын дамыту;

— жомарттыққа, қарапайымдылыққа тәрбиелеу.

Ресурстар:

«Өзін-өзі тану мұғаліміне арналған хрестоматия» «Бөбек»ҰҒПББСО

Алматы-2013

Сабақ барысы:

—Ұйымдастыру кезеңі. "5Т" ережесі.

Жағымды көңіл күйге келу.

Нұрға бөлену.

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап, жүрегіңіздің қауызын ашты.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі.

Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.

Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады.

Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді.

Нұр көздерімізге де жетті, көзіміз тек жақсыға қарап, бәрінен жақсылықты ғана көреді.

Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Нұр бірте-бірте қарқын және шұғылана бастайды, сіздің денеңізден шығып, жан-жағыңызға сәуле шашады. Осы нұрды туысқандарыңызға, мұғалімдеріңізге, достарыңызға, таныстарыңызға бағыттаңыз. Нұрды уақытша түсініспей, ренжісіп жүрген адамдарға да бағыттаңыз, олардың да жүрегі нұрға толсын.

Осы нұр бүкіл әлемге: барлық адамдарға, жан-жануарларға, өсімдіктерге, барлық тірі жанға таралсын... Ғаламның барлық түпкір-түпкіріне нұр бағыттаңыз.

Ойша айтыңыз: «Мен нұрлымын... Нұр менің ішімде... Мен Нұрмын». Осындай Нұр, Махаббат және Тыныштық күйінде отыра тұрыңыз...

Енді осы Нұрды жүрегіңізге орналастырыңыз. Нұрға толы бүкіл әлем сіздің жүрегіңізде. Оны осындай әсем қалыпта сақтаңыз.

Жаймен көзіңізді ашуға болады. Рахмет.

Үй тапсырмасын тексеру.

Оқулық, 108бет, №27сабақ.

Немат Келімбетовтің «Ұлыма хат» шығармасынан үзінді оқып келу.

Дәптер, 31бет, 1-тапсырма

Сұрақтар:

1.Жәнібектің игілікті іс істеуінің мәні неде деп ойлайсыздар?

2. Жәнібек қасындағы адамды несімен таңқалдырды?

3. Адамдар бір-бірімен риясыз араласуы үшін олардың бойында қандай қасиеттер болуы керек деп ойлайсыздар? Неліктен?

4. Адамдар бір-біріне көмектесу үшін міндетті түрде ол адамды тануы керек пе?

5. «Рухани әлемі мейлінше бай» дегенді қалай түсіндіңіздер? Мысал келтіріңіздер.

6. «Жүрек жылуы» деген сөздің мағынасын түсіндіре аласыздар ма? Ой бөлісіп көріңіздер.

7. Игілікті іс, жақсылық жасау қандай құндылықтың көрініс табуы деп ойлайсыздар?

8. Өздеріңіз үшін осы мәтіннен қандай ой түйдіңіздер?

Дәйексөз.

Жүрегіңнің сүңгі де түбін көзде,

Содан тапқан шын асыл тастай көрме.

Абай.