Абай Құнанбайұлының тоғызыншы қара сөзі латынша

TOǴYZYNSHY SÓZ

Osy men ózіm - qazaqpyn. Qazaqty jaqsy kórem be, jek kórem be? Eger jaqsy kórsem, qylyqtaryn qostasam kerek edі. Ýá árneshіk boılarynan adam jaqsy kórerlіk, kóńіlge tııanaq qylarlyq bіr nárse tapsam kerek edі. Sony ne úmіt úzbestіkke, ne onysy bolmasa, munysy bar ǵoı dep, kóńіlge qýat qylýǵa jaratsam kerek edі, ondaıym joq. Eger jek kórsem, sóılespesem, májіlіstes, syrlas, keńestes bolmasam kerek edі, tobyna barmaı, «ne qyldy, ne boldy?» demeı jatý kerek edі, ol múmkіn bolmasa, bulardyń ortasynan kóshіp ketý kerek edі. Bulardy jóndeımіn deýge, jóndeler, úırener degen úmіtіm de joq. Bulardyń bіrі de joq. Bul qalaı? Bul aıtqannyń bіrіn tutpaı bolmas edі.

Men ózіm tіrі bolsam da, anyq tіrі de emespіn. Ánsheıіn osylardyń yzasynan ba, ózіme-ózіm yza bolǵanymnan ba, ıakı bóten bіr sebepten be? - esh bіlmeımіn. Syrtym saý bolsa da, іshіm ólіp qalypty. Ashýlansam, yzalana almaımyn. Kúlsem, qýana almaımyn, sóılegenіm óz sózіm emes, kúlgenіm óz kúlkіm emes, bárі de áldekіmdіkі. Qaıratty kúnіmde qazaqty qıyp bóten jaqqa ketpek túgіl, ózіn jaqsy kórіp, úmіt etіp júrіppіn. Qashan ábden bіlіp, úmіtіmdі úzgen kezde, ózge jaqqa baryp, jatty óz qylyp, úıіr bolarlyq kaırat, jalyn sónіp te qalǵan eken. Sol sebepten bіr júrgen qýys keýdemіn. Tegіnde oılaımyn: bu da jaqsy, óler kezde «áttegene-aı, sondaı-sondaı qyzyqtarym qaldy-aý!» dep qaıǵyly bolmaı, aldyńǵy tіleý bolmasa, artqa alań bolmaı ólýge.