Ахмет Байтұрсынұлы туралы тәрбие сағаты, 2 бет

ҚАЗАҚТЫҢ РУХАНИ КӨСЕМІ – АХМЕТ БАЙТҰРСЫНОВ

...Тән көмілер, көмілмес еткем ісім,Ойлайтындар мен емес бір күнгісін.Жұрт ұқпаса ұқпасын, жабықпаймын,Ел - бүгіншіл, менікі - ертең үшін.

А.Байтұрсынұлы

Қазақтың ұлы жазушысы Мұхтар Әуезов: «Ахаң ашқан қазақ мектебі, Ахаң түрлеген ана тілі, Ахаң салған әдебиеттегі елшілдік ұраны – «Қырық мысал», «Маса», «Қазақ» газетінің қан жылаған қазақ баласына істеген еңбегі, өнер-білім, саясат жолындғы қажымаған қайраты, біз ұмытсақ та, тарих ұмытпайтын істер болатын» - деп алаштың ардақтысы Ахмет Байтұрcыновтың адамдық болмысы мен азаматтық, шығармашылық және қайраткерлік, ғалымдық игі істеріне әділ баға беріп еді. XXI ғасыр көгінде Ахмет Байтұрсынов мұрасы жаңаша қырларынан танылып, қазіргі күннің рухани-мәдени талғам таразысынан өз бағасын алуда. Оның дәлелін Ахмет Байтұрсынов атындағы жоғарғы оқу орны мен ғылыми-зерттеу институтының, мұражайлардың, ахметтану саласында еңбек етіп жүрген ғалым-ұстаздардың оның мұрасын зерделеу арқылы руханият қазынасын құнды дүниелермен кемелдендіре түсуінен тануымызға болады. Сонымен қатар, жігерлі жастардың ұлы тұлғаның өмірі мен шығармашылық, қайраткерлік істеріне қызығып, зерттеу істеріне араласуы мен түрлі деңгейдегі іс-шараларды ұйымдастыруы рухани жетілуіміз бен дамуымыздың бір көрінісі деп ойлаймыз.

Ұлттық және жалпыадамзаттық құндылықтық бағдарда кәсіби білім мен тәрбие беріп келе атқан әл-Фараби атындағы Қазақ ұлттық университеті – еліміздегі бірегей жоғарғы оқу орны. Білімгерлер өздерінің терең білімдері мен рухани-адамгершілік мақсаттағы жетістіктерімен әрқашан қуантып келеді. Жуырда, университет қабырғасында т.ғ.к., профессор Ф.А.Қозыбақованың ұйытқы болуымен қазақ тілі мен әдебиеті мамандығының 1-курс студенттері арасында Ахмет Байтұрсыновқа арналған «Қазақтың рухани көсемі – Ахмет Байтұрсынов» тақырыбында конференция болып өтті. Конференцияның мақсаты – Ахмет Байтұрсыновтың өмірі, қызметімен қатар, түрлі ғылым салалаларында (тіл білімі, әдебиеттану, тарих т.б.) қалдырған мол мұрасын зерттеу, зерделеу және бүгінгі ел дамуындағы маңызды мәселермен («Рухани жаңғыру», «Қазақ әліпбиінің латын қарпіне көшу», «Мәңгілік ел» т.б.) салыстыра қарастыру болатын. Конференция барысында өміріндегі негізгі тарихи кезеңдер жайлы хронологиялық ақпарат берілді, кей мәселелер төңірегіндегі пікірлері қызу талқыға түсті. Елбасымыздың «Болашаққа бағдар: рухани жаңғыру» мақаласында айтылған «Жаңа тұрпатты жаңғырудың ең басты шарты – ұлттық кодыңды сақтай білу»…