Ауылым алтын бесігім тақырыбындағы әдеби эссе

Ауылым-алтын бесігім

«Ауыл» біреулер үшін төрт-ақ әріптен тұратын бір далбаса сөз, ескі ұғым болатын болса, мен үшін жүрегімнен ерекше орын алатын түсінік. Себебі «ауыл» сөзінің астарында менің шыр етіп дүниеге келгеннен басталған сәби-бала кезім, алғаш мектеп табалдырығын аттаған оқушы кезім бәрі-бәрі ауылмен байланысты. Балалықтың бал күнін кешкен қаншама сырлар мен қызықты оқиғалар жатыр... Ендеше бір сәт ауыл жайлы қалам тартсам деп едім.

Ауылым десем ойыма Шығыстың мөлдір гауһары- Күршім есіме түседі. Менің өмірдегі баға жетпес қос шынарым, ата-анам осы Күршім жерінің тумалары. Күршімнің Топтерек ауылында шаңына аунап мен де өстім. Кейіннен ата-анамның қызметіне байланысты Өскемен қаласына көшіп келдік. Алғаш келгендегі сезімім ерекше болғанымен, ауылға деген сағыныш жүрек түкпірінде мәңгі ұялап қалды. Әрине, кейіннен қала тұрмысына да үйрендім. Дегенмен, жазғы демалыс кездерінде ауылға жыл сайын барып тұруға тырысамын.

Қазақ тарихындағы қай ғұлама-ғалым болса да, атағы жер жарған ұлы тұлға болса да, небір ақын-жазушы болса да осы ауылдан шықты десек артық айтпаған болар едім. Барлығы да ауылдың саф ауасымен тыныстап, атқа мініп, көбелек қуып, шаңына аунап өсті. Туған жердің құдіреті олардың осындай тұлға болып қалыптасуына әсер етті. Қазақ поэзиясының дүлдүлдері,атақты зиялылары,ойшылдары бәрі-бәрі ауылдан шыққан қара домалақ балалар емес пе?! Олар өз шығармаларында, өз естеліктерінде ауыл өмірінің қызығы мен шыжығы жайлы сипаттайды. Иә,иә, қай қазақ шығармасын алсаңыз, сізге ауылдағы қарбалас тіршілік пен қайнаған өмірді көрсетеді.

Осындай көрнекті жазушылардың бірі- Тахауи Ахтанов. Оның: «Ойлап отырсам, талантты ақын-жазушылардың тоқсан тоғыз пайызы ауылда дүниеге келген екен. Сондықтан біздің ұямыз- ауыл. Біздердің қан тамырымыз да, жүрегіміз де ауыл деп соғады» - деп айтқаны менің сөзімді айқындай түскендей.

Сондай-ақ, өзіміздің жерлесіміз, шұрайлы Шығыс өлкесінің мақтанышы, қарасөз сүлейі Оралхан Бөкейдің шығармаларынан да ауыл көрінісін байқауымызға болады. Автор өзінің туған жері Катонқарағай өлкесінің таңдай қақтырарлықтай табиғаты мен естен кетпес оқиғаларын суреттейді. Автор «Апамның астауы» атты шығармасындағы: «Жаз шыға бере, бәріміз апам есіп берген жіпті алып, тоғайға отынға аттанатынбыз. Бір-бір арқа…