Балалықтың бал шағы туралы қазақ тілі мақаласы

Балалықтың бал шағы

Балалық, сенен артық күнім бар ма,Бала күнде бойымда мінім бар ма?Бәріне жетем деймін, алам деймін,Жас қиялда тоқталып, тыным бар ма?

С.Торайғыров

Тәуелсіз еліміздің балаларына қарап «Қазіргі балалар бақытты!» деп қызығасың да қуанасың. « Бала дегеніміз -болашақ» деген екен француз жазушысы Гюго Виктор Мари. Ендеше болашағымыз бақытты болсын деймін.

Жадыраған жаз жетті. Жазбен бірге шат-шадыман балалықтың бақытты балдәурен мерекесі Балаларды қорғау күні де жаздың бірінші күнінде салтанат құрды. Бұл күні әр ата-ана, балабақша, мектеп, қала мереке иелеріне барынша қызықты мерекелік шаралар ұйымдастырады. Үлкендер ұйымдастырады, ал мерекені басынан аяғына дейін жасаушы, атқарушы, әрине, балалардың өздері.

Бала -әр отбасының, еліміздің болашағы. Бала –бақытсыз-ақ бақытты болып жүретін бақыт иесі. «Адамның бір қызығы бала деген »-деп Абай атамыз айытқандай, мынау тіршілікте адам баласының алтынға айырбастап ала алмайтын аяулы сәттері көп-ақ. Халқымыз желкілдеп өсіп келе жатқан қыз баланы елдің көркі санаса, ал ер баланы елдің қорғаны санаған. Балалық шақ- адам өміріндегі ұмытылмайтын қызықты да бақытты кезең. Сондықтан да әр бір қараша үйдің түтінін түтеткен ата-ана көзінің ағы мен қарасындай перзентінің өмірдегі осынау сәттерді мүмкінділігіше есте қаларлықтай етіп өткізуді ойластырады.

Қала бойынша мерекелік түрлі шаралар ұйымдастырылды. №12 орта мектептің оқушылары сол шаралардың барлығына дерлік қатысты.

Балаларды қорғау күніне орай мектеп жанындағы жұмыс жасайтын алаңқайлар, лагерлер де өз жұмысын бастайды. Мектеп жанында жұмыс жасайтын «Арай» жазғы сауықтыру алаңқайы 1-кезең жұмысын бастап кетті. Тәрбиешілер алаңқайды «Ертегілер елі» бейнесінде безендірді. Алаңқайдың мерекелік салтанатты ашылуы болды. Мерекенің әншілері де, бишілері де, күйшілері де, әзілкештері де –бастауыш буын балдырғандары. Мектеп алдындағы асфальтта түрлі-түсті бормен топтар сурет салды. Балалар үшін мектеп асханасында мерекелік дастархан жайылды.

Бірінші кезеңге 170 бала қамтылды. Бастауыш сынып оқушылары қатысатын 8 топпен 8 тәрбиеші, 2 тәлімгер жұмыс жасап жатыр. 8 ойын кабинеті, 1 кинотеатр, спортзал, спорт алаңы, асхана, үйірме жұмыстары үшін 2 кабинет жұмыс жасауда.