Бастауышпен қоштасу ойындар мен сценарий 4-сыныпқа

Мақсаты: 1. Білімнің сара жолы бастауыштан басталатынын , бастауышта алған білімнің негіз болып қаланатынына көз жеткізу.

2. Бастауыш сыныбымен , алғаш қолына қалам ұстатқан алғашқы ұстазымен қоштаса отырып, орта буында дәріс беретін ұстаздармен таныстыру,әр баланың ерекшелігін таныта отырып, сәт – сапар тілеу.

3.Білім берер ордасы- мектепті , ұстаздарын құрметтеп, білімге деген құштарлғын арттыру.Өз Отанынының адал ұлы мен қызы болуға тәрбиелеу.

Көрнекілігі: «Шуағын төккен 4 жыл» фотомонтажы. Слайдтар.

Қанатты сөздер мен тақырып.

Кіріспе сөз:

Лаззат:

Бұл оқу тамақ болар қарны ашқанда,

Жол табар қараңғыда адасқанда .

Мал озбас біле білсең білім озар,

Ақыры керек болар бір сасқанда – деп Міржақып ақын айтпақшы , тарыдай болып кіріп, ақыл ойлары толысып, оң мен солын танып жақсы мен жаманды айыра білуді үйренген шәкірттеріміздің ұйымдастыруымен өткізілгелі отырған « Қош бол, бастауыш» мерекесін бастауға рұқсат етіңіздер!

Гүлхан:

Қош келіпсіздер , құрметті ата – аналар, қымбатты әріптестер, оқушылар! Бүгінгі күн осында отырған бәріміз үшін ерекше күн. Оның ерекшелігі сол, осыдан 4 жыл бұрын мектеп табалдырығын жүрексіне аттаған балаларыңыз білімнің негізі болатын бастауышта оқып, білім алып, қанаттарын қатайтып бастауыш сыныппен қоштасқалы отыр.

Бесіктегі баланың,

Күлгенін көрген – бір мұрат.

Алдына түсіп ананың.

Жүргенін көрген- бір мұрат – дегендей, бастауыш сыныпты бітіруші түлектерімізді ортаға шақырайық!

Ләззат:Толқимыз , толқып тұрсыз баршаңыз да

Мұндай күй болған сірә қаншаңызда

Қол соғып, қошеметтеп шақырайық

4- сыныптарды ортамызға!

Музыка әуенімен бастауыш сынып түлектері ортаға келеді.

Ерұлан мен Айсырға

Айсырға өте жақсы оқиды

Көңілге бәрін тоқиды.

Үндемей жүрген Ерұлан

Ылғи 5-ке оқиды

Аймира мен Ақлен

Билейді кейде айнала

Көркіне ақылы сай ғана.

Аймира біздің әдемі

Сөйлейді өзі жәй ғана

Білім алу талабы,

Кілең бестік сабағы.

Сыныбында Ақлен

Мәңгі үздік боп қалады.

Мықтыбек пен Арай

Салмақпен ғана сөйлеген,

Сабақтан қалып көрмеген.

Кешігіп келсе Мықтыбек

Маңдайы шып-шып терлеген

Сабақтан еш қалмайды

Жалқаулыққа бармайды

Сүп-сүйкімді Арайлым.

Әні мен биін арнайды.

Тұрсынбек пен Жарқынай

Жақсы оқып сабақты,

Қатардан еш қалмады

Қылығымен Тұрсынбек,

Қуантады баршаны

Көршісі оның Жарқынай

Түрі оның тартымды-ай.

Жүреді ойлап сабақты,

Кереді ол қасын-ай

Гүлхан: Сіздердің алдарыңызда тұрған 4- сынып оқушылары осыдан 4 жыл бұрын 6 жасар бала болса, бүгін міне , ес біліп, етек жиған шәкірт. Міне , бүгін біздің бүлдіршіндер өміріне өшпес із қалдырған бастауыш сыныбымен қоштасып, бір жылға тағы да есейгелі отыр.

Ләззат:Ендеше қызықты да ғаламат өзгерістер сыйлаған , білім нәрімен сусындатқан ,өмірде өз жолдарын табуға жол сілтеген ұстаздарына,

ата- аналарына өз өнерлерін көрсетуге дайын.Олай болса жүргізушілерімізді ортаға шақырайық!

Мереке: Ассалаумағалейкум , ағайын !

Бану: Армысыздар , аяулы ұстаздар , ақ жаулықты аналар, ардақты әкелер !

Мереке: Қош келіпсіздер , құрметті қонақтар !

Бану: Ия, бүгін бізде қуаныш , бүгін бізде үлкен той.

Мереке: Өйткені 4 жыл бойы білім беріп, ой санамызды дамытқан , адамгершілікке, адалдыққа баулыған , қолымызға алғаш қалам ұстауды үйреткен , әріптер мен сандардың сырын ұғындырған алғашқы ұстаздарымызбен қоштаспақпыз.

Бану: Қолға қалам ұстатып, Білім құйған санағаХормен : «Ол алғашқы ұстаз ғой»

Мереке: Олай болса, Бану, кешімізді бастамас бұрын құттықтау сөзге кезек берейік.

Күндіз-түні ойлайтыны мектеп қамы

Баршаны аялаған алақаны

Мектебіміздің басшыларының,

Тынымсыз атып жатыр әрбір таңы- дей келе мектебіміздің оқу ісінің меңгерушілері: Лаура апайға, Нағима апайға және дайындық сыныбындағы алғашқы ұстазымыз Күріш апайға құттықтау сөз кезегін береміз.

Бану: Бала шаққа болашақты жырлатып, Шәкірттерге ой түзеткен сымбатты. Күн нұрындай сәуле құйған көңілге, Армысыздар , ұстаздарым қымбатты !

Мереке: Армысыздар әжелер мен аналар Ұрпағыңыз күнде өзіңнен бата алар. Ел дәстүрін мәңгі сыйлап оқы деп, Үйреткен ғой Абай, Ыбырай бабалар

Бану: Армысыздар өр тұлғалы әкелер!

Қыран құстай балапанын мәпелер.

Бүгін міне бастауышпен қоштасады,

Азамат боп , кешегі сәби- еркелер!

Мереке: Армысың сен, алтын ұя мектебім Саған айтар жыр – алғысым көп менің Жүректерге жаққан білім шырағын, Мектебіме арналады бұл әнім !

Бану: Дұрыс айтасың Ақжол! Бұл мектептен қаншама адам тәлім алған десеңші . Менің атам да , әжем де, әкем де, анам да, енді мен де мектептен тәлім алудамын.

Мереке: Ия , мектебімізге қандай жыр арнасаң да жарасады. Ендеше сыныптарымыздың мектепке арнаған жырларын тыңдайық.

Жұлдызбек:Әлі есімде мектепке алғаш келгеніміз

Ұстаздарды ең алғаш көргеніміз Жасқаншақтап тосырқап тұрған шақта Өзің болдың ұстазым сенгеніміз

Дана:Мектебіміз осы ма ? -деп Отыз шәкірт келіпті. Жылы жүзді ұстазын Алғаш рет көріпті. Бірін-бірі жетектеп Ұстазына еріпті. Болашағы нұрлы ден

Ата-аналар сеніпті.

Нұрберген: Кітап, қалам қолға алдық Бір сыныпқа жиналдық. Ажырамай арамыз Болашаққа барамыз.

Аймира : Мектеп деген білім кені , жыр кені , Мектеп деген ғылымның ең үлкені. Мектеп деген тәрбиеші адамға Мектеп деген даналардың мекені.

Жайна: Ұлылықты ардақ тұтар үнемі, Атын ұя, ақ босаға киелі. Қанат қаққан білім алып өзіңнен , Күллі шәкірт саған басын иеді.

Жансерік: Мектебім, алтын ұям, нұрың жарық, Жайнаттың үмітімнің гүлін жарып.Сүйкімді сенің күміс қоңырауың , Тұрады құлағымда сыңғыр қағып.

Жанбота: Мектеп - үйім , ұстазым , менің ата-анам, Сенен өсіп, сенен ғана нәр аламын. Саяң ыстық , сен мәуелі бәйтерек Тамырланып , сан тарапқа тараған.

Мықтыбек: Мектеп – кеме, білім – теңіз, Барар жерге тез жетеміз. Төрт жыл алған білім нәрін , Азық етіп ер жетеміз.