Білім беру сапасын арттырудағы мұғалім рөлі туралы эссе

Білім беру сапасын арттырудағы мұғалімнің рөлі

Білім - беру бүгінді таңда ең басты құндылық. Білімді әлеуметтік желілерден де, кітаптардан да алуға болады, алайда сапалы білімді тек мұғалім ғана шәкірт санасына құя алады. Ұстаздың ұстанымы мықты, мақсаты айқын болса, білім сапасы да артады. Білім тек пәндік ұғымдардан тұрмайды, шәкіртке шабыт беруден, жан-жақты дамытудан, өз елін, жерін, тарихын сүюді бойына ұялатудан тұрады. Сонда ғана берген білімнің сапасы да айқындала түседі.

Білім беру сапасын арттыру үшін, біріншіден, оқушының қызығушылығын оята білу. Әр сабағыма тың әдіс-тәсілдермен оқушыларды қызықтыра білсем, сабақ түсінікті болады, аудиовизуалды, ақпараттық техникалық құралдарды да орнымен қолдана білсем, оқушы ұғымына жеңілірек болады. Ағылшын пәні ойын элементтерімен жандана түсетіндіктен, тәжірибемде ойын түрлері мол.

Екіншіден, оқушылармен қарым-қатынасты нығайту. Әр оқушының қабілет-қарымын ескере отырып жеке тапсырмаларды уақыт бөліп дайындай отырып, шабыт беремін. Кейде қатып қалған қағидамен, оқушымен салқын қарым-қатынас жасап, жалпылама тапсырма берумен шектелетін жайттар болатыны шындық. Қазіргі заман талабына сай, ең маңыздысы - әр оқушының тұлғалық қабілетін ескеру. Шығармашылыққа баулу, ынтасына қарай жұмыстану басты назарымда.

Үшіншіден, әр шәкіртті шынайы тұлға ретінде жақсы көру, мейірімге бөлеу, мадақтау. Білім алуына шабыт бере отырырып, өз бетінше ізденуіне даңғыл жол салу. Қазіргі таңда оқушылардың барлығында ұялы байланыс бар, оларға жақындай түсу үшін күніге бір оқушымен байланысқа түсіп, оның жақсы қасиетін айта отырып, берген тапсырмамды орындай алуына қабілетінің жететіне сенім білдіремін. Осы арқылы жүрегіне жол тауып, жауапкершіліктің жүгін де ұғындырамын. Еңбек жолымда артта қалған жылдарым - мен үшін шығармашылық өсу, тәжірибе жинау мектебі. Баулыған шәкірттерім пәндік олимпиларда сан рет топ жарса, ғылыми жобадан біраз белеске шықты, эссе жазудан да жүлделі болды.

Ойымның қорытындысына қалам тарта отырып, айтарым - XXI ғасыр- білімділер ғасыры. Ендеше, егемен елімізге ой - өрісі жоғары, білімді, парасатты ұрпақты тәрбиелеу мұғалім берген сапалы білімнен басталады. Әрбір сабағымызды қайталаусыз, қызықты етіп өткізу үшін үнемі шығармашылық ізденісте болуымыз керек. Сонда ғана сапалы білімге қол жеткізіп, абыройымыз арта түседі.