Білім мазмұнын жаңарту және білім сапасын жетілдіру

БІЛІМ МАЗМҰНЫН ЖАҢАРТУ ЖАҒДАЙЫНДА

БІЛІМ САПАСЫН ЖЕТІЛДІРУ ЖОЛДАРЫ

Темирбулатова Эльмира Дулатовна –

ағылшын тілі мұғалімі.

«Балдәурен» РОСО,

Щучинск қаласы.

«Табысты болудың ең іргелі, басты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі, құндылықтар жүйесінде білімді бәрінен биік қоятын ұлт қана табысқа жетеді», - деп Елбасымыз өзінің «Болашаққа бағдар: рухани жаңғыру» атты бағдарламалық мақаласында бүгінгі таңдағы білімнің бағасын анық айқындап берді. Сонымен қатар Қазақстан Республикасының Білім туралы Заңында: «Білім беру жүйесінің басты міндеті- ұлттық және жалпы азаматтық құндылықтар, ғылым мен практика жетістіктері негізінде жеке адамды қалыптастыруға және кәсіби шындауға бағытталған білім алу үшін қажетті жағдайлар жасау, оқытудың жаңа технологияларын енгізу, білім беруді ақпараттандыру, халықаралық ғаламдық коммуникациялық желілерге шығу» - деп білім беру жүйесін одан әрі дамыту міндеттерін алға қойған.

Қоғам талабына сай жеке тұлға қалыптастыруды дамыту мен оған жан-жақты терең білім беру мақсатында тиімді педагогикалық технологияларды қолдана білу. Педагогикалық технологиялардың басты мақсаттарының бірі – баланы оқыта отырып, оның еркіндігін, белсенділігін қалыптастыру, өз бетінше шешім қабылдауға дағдыландыру.

Осыдан бір ғасыр бұрын, көрнекті жазушы Жүсіпбек Аймауытов: "Сабақ беру-үйреншікті жай ғана шеберлік емес, ол жаңадан жаңаны табатын - өнер" деген еді. Қазаргі жаңартылған білім беру мазмұнына сәйкес әр пән мұғалімі оқытуда сабақтың сапасын көтеру үшін, оның әдістерін бүгінгі күн талабына сәйкес қолданып, өткізуге тырысады.

Бүгінгі күні біз жаңа дәуір – жаңа ғасыр – жаңа мыңжылдықта өмір сүріп отырмыз. ХХІ ғасыр – білімділер ғасыры. Бүгінгі шәкірт - ертеңгі ел тізгінін ұстар, мемлекетіміздің болашағы. Қазіргі кезде жас ұрпаққа сапалы біліммен саналы тәрбие беруге мемлекеттік деңгейде мән берілуде. Осыған дәлел Елбасы Н.Ә.Назарбаевтың Қазақстан халқына жолдауында «...ұлттың бәсекелестік қабілеті, алдымен оның білім деңгейімен айқындалатыны» атап көрсетілген. Мұғалім білімі бүгінгі таңда оның күнделікті оқу үрдісіне қолданатын әдіс-тәсілдеріне, жаңа технологияларды таңдап, нәтижеге қол жеткізе алумен, өз білімін үздіксіз көтеріп отыруымен де айқындалады.

Оқыту үдерісінің жүйелі, түсінікті, нақты қалыптасуы пән мұғаліміне байланысты. Ендеше қазіргі ұстаздар;

педагогикалық үрдісте жүйелі жұмыс жүргізе алатын;

педагогикалық өзгерістерге тез төселетін;

жаңаша ойлау жүйесін меңгере алатын;

оқушылармен тез тіл табыса алатын;

білімді, іскер, шебер болу керек.

Жаңа педагогикалық технологияның ерекшеліктері-өсіп келе жатқан жеке тұлғаны жан-жақты дамыту. Инновациялық білімді дамыту, өзгеріс енгізу, жаңа педагогикалық идеялар мен жаңалықтарды өмірге әкелу. Бұрынғы оқушы тек тыңдаушы, орындаушы болса, қазіргі оқушы өздігінен білім іздейтін жеке тұлға екендігін ескеруіміз керек.

Қазіргі оқушы:

дүниетанымы жоғары;

дарынды, өнерпаз;

ізденімпаз, талапты;

өз алдына мақсат қоя алатын; - өзіндік пікірі бар. т.б.

Олай болса, қоғам болашағы – жас ұрпақтың бойына адамгершілік, ізгілік, мейірімділік, ақыл-ой, сана-сезім қалыптастыратын ізгі істерді жаңаша құру қажет. Ол үшін әрбір өтетін сабағымызға жан-жақты, тыңғылықты ізденіп, даярлануымыз керек. Оқушының пәнге деген қызығушылығын арттыру мақсатында әртүрлі инновациялық технологияларды тиімді пайдалану – мұғалім шеберлігіне байланысты. Жаңа бағдарлама мұғалімдерге қазіргі заманғы оқыту әдістерін жеті модуль арқылы ұсынады.

1. Білім беру мен білім алудағы жаңа тәсілдер;

2. Сыни тұрғыдан ойлауға үйрету;

3. Білім беру үшін бағалау және оқытуды бағалау;

4. Білім беруде ақпараттық-коммуникациялық технологияларды пайдалану;

5. Талантты және дарынды балаларды оқыту;

6. Оқушылардың жас ерекшеліктеріне қарай білім беру және оқыту;

7. Білім берудегі басқарушы және көшбасшылық.

Оқушыларды сапалы оқыту мен тәрбиелеуде, «Балдәурен» РОСО мұғалімдерді шығармашылық әрекетке баулуда, білім беру саласындағы жаңалықтарды, озық іс-тәжірибелерді зерттеп, оқып-үйрену, жинақтау, тарату мақсатында мектепішілік апталықтар, ашық сабақтар, іс-тәжірибе алмасу мақсатындағы семинарлар өткізіледі.