Бүгінгі жас маман ертеңгі елдің тірегі мақаласы

Бүгінгі жас маман– ертеңгі елдің тірегі...

Толқындары тентек Каспийге ғашық емес адам сирек шығар. Алайда, аталған саланың тізгінін ұстап, білікті маман болу ілуде біреу. Бүгінгі таңда еліміздің батыс өңірі Маңғыстауда, ертеңгі елдің тірегі, болашақ жас теңізшілерді даярлайтын Каспий өңірі «Болашақ» колледжі орналасқан. Аталған білім ордасында елдің тізгінін ұстайтын жас өрендерді теңізші болуға бейімдеп, біліктілігін арттыратын ұстаздары жетіп артылады. Күрмеуі қиын саланы игеруде, жәй ғана теорияны білу жеткіліксіз екенін білетін мамандар, студенттерді үнемі алған біліммен қоса тәжірибемен ұштастырып отыруды дәстүрге айналдырған.

ЖШС «Каспий өңірі «Болашақ» колледжінде «Су көлігін пайдалану» мамандығының 2 курсында 23 студент тәлім алады. Жылдық жоспарға сәйкес оқу орнының студенттері колледж қабырғасында 72 сағат аясында «Оқу тәжірибесі» бойынша тәжірибеден өтті. Тәжірибеде шәкірттер кеме құрылғыларын жақынырақ біліп, олардың жұмыс істеу шарттарымен танысты. Жұмыс орнында келеңсіз жағдай орын алған жағдайда, алғашқы көмек көрсетудің тың тәсілдерін меңгерді. Сондай-ақ тәжірибе барысында студенттер шетелдік үлкен кемелердің күрделі құрылғыларымен танысып, жөндеу жұмыстарында қолданатын әдіс-тәсілдері жайында пайдалы ақпарат алғанын айтпай кетуге болмайды. Жоғарыда айтқан тәжірибелі мамандардың даярлық сағатынан өткен колледж студенттері мамандықтары бойынша ауқымды ақпарат алып қоймай, жауапты салада қандай олқылықтарға жол берілмейтінін білді.

Сонымен қатар студенттер вахталық әдістің қыр-сырларымен танысып, теңізде көретін қиындықтарды қалай жеңуге болатынын білді. Алдарына нысаналы мақсат қойып, іс жүзінде орындауға келгенде енжарлыққа жол бермеу керек екенін назарда ұстауды үйренді. Оқу тәжірибесі бойынша ЭВТ-18 тобының білім алушылары өздерінің теориялық білімін көрсетіп, тәжірибе барысында жақсы қырларынан көріне білді.

Ойымды Хәкім Абайдың сөзімен түйіндесем, әр адам бір мамандықтың тізгінін ұстап, қайратпен еңбек етуі тиіс деген болатын. Бүгінде менің алға қойған мақсатым, сұранысқа ие теңізшілерді дайындау, түбекте сапалы теңізшілерді қалыптастыру. «Қалтарысы мен бұлтарысы» жетіп артылатын ұстаздық жолда тәрбиелі, білімді азаматтарды ақ жолға бастау.

Маңғыстау облысы,

Ақтау қаласы,

Каспий өңірі «Болашақ» колледжінің арнайы пән оқытушысы Битеуов Р.