Диалогтік оқытуға арналған мақала, 5–11 сыныптар

Диалогтік оқыту – тарих сабағында

Менің тарих пәні мұғалімі ретінде алға қойған мақсатым – білім мен тәрбиені ұштастырып, оқытудың тиімді нысандары мен әдістерін енгізіп,қоғамға жоғары мәдениетті, білімді, әлеуметті тұлғаларды тәрбиелеу.

Тарих – мектептегі оқу пәні ретінде жалпы негізгі білім беретін барлық гуманитарлық және қоғамтанушылық курстардың негізін құрайды. Бұл пән ұлттық өзіндік сана-сезімді және адамгершілік, этикалық нормаларды қалыптастыра отырып, оқытудың дүниетанымдық негізін қалыптастырады. Тарихтың басқа пәндермен өзара байланысы талдау, жинақтау сияқты ортақ логикалық таным-әдістерін қолдануға мүмкіндік береді. Мысалы, гуманитарлық циклдағы пәндермен байланысы картамен, мәтінмен жұмыс істеу, оқиғалар мен құбылыстардың ерекшеліктерін айқындау сияқты ортақ әдіс-тәсілдері негізінде іске асады.

Балалардың тарихқа деген қызығушылығын арттыру үшін сапалы білім берудің тиімді жолдарын таңдау, тарихи және мәдени мұралармен таныстыру, қосымша элементтерді пайдалану мен тарихи деректерді оқып білім алып шығармашылықпен айналысуына жағдай жасау сияқты жаңа педагогикалық технологиялар мен инновациялық бағыттарды, әдістер мен тәсілдерді енгізу қажет. Әрине, білім сапасы оқушының білімге деген құштарлығы мен қызығушылығына тікелей байланысты. Қазіргі таңда заман талабына сай мұғалім «білім бұлағы» емес, «білім бұлағына жеткізуші» болуы тиіс. Өзімнің тәжірибемде, тарих сабағында диалогтік оқыту әдістемесі барысында балалар талқылау, білімді бірлесіп құру, түсіну мен дағдыларын жетілдіре алады. Диалог арқылы оқытудың тарих сабағында алатын орны ерекше. Дәріс барысындашәкірттердің әңгімелесуінің, пікірлесуінің көп маңызы бар. Топтық, жұптық жұмыс барысында диалогтік оқыту өз ойларын білдіруге мүмкіндік береді. Оқушыларға өзінің серіктесін түсінуге, онымен қарым-қатынас жасауға көмектеседі. Идеяларын ортаға салуға сыни тұрғыдан ойлауға мүмкіндік алады. Жоғары деңгейлі сұрақтарға жауап беруде ізденіс жасайды. Жалпы диалог оқушының сыни тұрғыдан ойлауына жетелейді.