Достық татулық белгісі балабақшаға арналған ойындар

«Достық татулық белгісі»

Мақсаты: 1-мамыр Қазақстан халықтар бірлігі күні екенін балаларға жеткізу.

Ынтымаққа, достыққа, өз Отанын сүюге, қорғауға тәрбиелеу.

Жүргізуші: Құрметті қонақтар, тәрбиеші апайлар, кішкентай бүлдіршіндер сіздерді 1-мамыр Қазақстан халқының бірлік күні мерекесімен құттықтаймыз.

Көзді ашып жұмғанша көлбең ете қалған көктемнің соңгы айы мамыр да маңғаз болып маңымызға келіп қалды.Алғашқы күнімен бірлік пен берекеге бастайтын бұл айдың барша адамзат үшін асқақ абыройы бар.Дүние жүзілік Ынтымақ, Еңбек,Бейбітшілік күні біздің елімізде де «Қазақстан халықтарының бірлігі күні» деп аталып өтіледі

Тәуелсіздік кіндігін

Кескен халық бірлігі

Ынтымағы барша ұлттың

Нұрын шашқан күн бүгін-дей отырып «Ғарышкер» балабақшасының бүлдіршіндерінің 1-мамыр мерекесіне арнаған ертеңгілігін тамашалаңыздар.

Балалар, бүгін күн қандай тамаша.Күн нұрын бүкіл жер бетіне, әлем балаларына бірдей төгіп тұр.Жер бетінде барлық ұлттар тату болса – бұл бейбітшілік.1-мамыр бірлік күні достықтың, татулықтың күні.Мереке құтты болсын.

Жүргізуші: барлық ұлт өкілдері бәрімізге ортақ жер шарында да тату болып өмір сүріп жатырмыз, ендеше бәріміз бірге Ахмет Жұбановтың «Ақ көгершін» әнін орындайық.

Ақ көгершін,көгершін

Қол қанат құс сен едің.

Бар кезіп қайт ел үшін,

Кең дүниенің көлемін.

Әділеттің құсы деп,

Көз алмастан жолыңнан,

Бақыт болып қоншы деп,

Ұшырамын қолымнан.

Қайырмасы.

Ел тілегін алып ұш,

Адамзаттың бағына,

Қара бұлтты жарып ұш,

Мұхиттың арғы жағында.

Жүргізуші: Өте жақсы балалар.Өлеңді жақсы орындадыңдар.Енді орнымызға жайғасайық.(Балалардың қолындағы құралдарды жинап алу).

Жан бітеді қуантып,

Гүлін төккен, Мамырым,

Мейірімге құмар қып,

Нұрын төккен,Мамырым,-дей отырып,кезекті балалардың өлең шумақтарына берейік.(Көркем,Наурыз,Інжу,Ұлмекен,Амалбек,Диана,Қаршыға)

Көркем: Көрікті өлкеме қарашы

Тізілген орман тау қаласы

Алтай мен Атырау даласы

Қазақтың кең байтақ даласы.

Наурыз: Достық бізге тым ыстық

Бірлік-байлық, ырыс құт

Жарқырасын күніміз

Жаса, жаса тыныштық.

Інжу: Аймағы шат, ырысты ел,

Тау, құм өлке, күміс көл,

Кең жайлауда бір жүрген,

Қазақтарға туыс мен.

Ұлмекен: Ақ қара деп алдымен,

Елім бөлмес адамды,

Дәстүр өнер салтымен,

Таң қалдырған ғаламды.

Амалбек: Жырласа қазақ түркімен,

Молдаван,тәжік үн қосқан,

Дос жүректер біріккен,

Мейірімдері жарасқан.

Диана: Достарды біз қолдаймыз,

Қиын шақта қолдаймыз,

Біздің топта ұл-қыздар,

Тату-тәтті ойнаймыз.

Қаршыға: Берсең доқа қол ұшын,

Досың сыйлар сол үшін,

Бізде араз болмаймыз,

Достықты әркез сыйлаймыз.

Жүргізуші: Мың бұралған арулар,

Дөңгелене ырғалып,

Шықты міне ортаға,

Домбырасын қолға алып,-деп қазақтың ұлттық биі «Домбыраны» бірге тамашалайық.

Жүргізуші: Өте жақсы балалар, енді сендерге мен мынадай сұрақтар қоямын, мұқият тыңдап алыңдар.

Жомартпын бай елмін,

Үлгіге сай елмін,

Достықты ту еткен,

Айтыңдаршы қай елмін?