Еңбек жолым және білім берудегі жаңашыл тәсілдер эссесі

Еңбек жолым және білім берудегі жаңашыл тәсілдерім

«Ұстаз болу – жүректің батырлығы, Ұстаз болу – сезімнің ақылдығы. Ұстаз болу – мінездің күн шуағы, Ұстаз болу – адамның асылдығы», - деп Ғ. Қайырбеков ұстаздардың ұлылығын бір шумақ өлең жолдарына сыйғызып жіберген. Өмірде мамандық көп. Әрқайсысының өз міндеті, өзіндік ерекшелігі бар. Ал мұғалім мамандығының басқа мамандықтардан ерекшелігі – басқа мамандықтың барлығы осы мұғалімнің алдынан өтеді, яғни мұғалімнен тәрбие алады, білім алады, үйренеді. Мен де бала кезімнен бастап, бұл мамандықты армандадым. Мектепті бітіріп, жоғарғы оқу орнына түстім. Оны бітіріп, ақыры арманыма жетіп, еңбек жолымды бастап кеттім..

Өзіме еңбек жолымды бастағаным кеше ғана сияқты, ал есептеп қарасам, мен еңбек жолына қадам басқанда жаңа туылған бала бүгінгі уақытта 30 жасқа толып қалыпты. Әрине, бұл аз уақыт емес. Бұл уақытта не тындырдым, қандай істер атқардым? – деген сұрақтарға тоқталсам, сонау 22 жасымнан бері қаншама шәкірттерді білім бұлағынан сусындатып, ұлттық құндылықтарымыз бен имандылықты жүрегіне ұялатып, санасына салт-дәстүрлерімізді сіңіре отырып тәрбиелеп, оқытып, мектеп ұясынан ұшырып, өмірден өз орнын табуға үлесімді қосудамын.

«Ұстаздың биігі ойлана қарасаң биіктей береді, үңіле қарасаң, тереңдей береді, қол созсаң қарсы алдыңда, айналсаң артыңда тұрғандай» – деп Сократ айтқандай бүгінгі таңда ұстаздар қауымына жүктеліп отырған міндеттер – мұғалімдердің жауапкершілігін бұрынғыдан да күшейтуде. Себебі, елбасы Н.Ә. Назарбаев «Қазақстанды ХХІ ғасырда дамыған елдермен теңестіріп, өркениетті әлемнен мәртебелі орын алуына ықпал етер бірден-бір құдірет – білім, білімді ұрпақ», - деп ХХІ ғасырды – ғылым мен білімнің ғасыры атады. Демек, еліміздің болашағы – бүгінгі жас ұрпақтың қолында, ал жас ұрпақтың болашағы – ұстаздардың қолында. Олай болса, еліміз дамыған 30 елдің қатарына қосылу үшін - шығыспен шынайы, батыспен байыпты, түстікпен түсінікті тіл табыса алатын, өзіндік пікірі қалыптасқан, бәсекеге қабілетті, жан-жақты жетілген тұлға қалыптастыру ұстаздар қауымының еншісінде екені айтпаса да, түсінікті деп ойлаймын.

«Ел мен елді, халық пен қалықты теңестіретін нәрсе, ол – білім», - деп ұлы тұлға М.Әуезов айтып кеткендей, білім – бұл қоғамның ең жауапты, ең қастерлі саласы. Сондықтан, Қазақстан Республикасы білім беруді дамытудың 2011-2020 жылдарға арналған мемлекеттік бағдарламасының басты мақсатын білімнің қолжетімділігі мен бәсекеге қабілеттілігін арттыру деп алып отыр.

Қазіргі жаһандану заманында әрбір жаңа ақпарат 2-2,5 жылда ескіріп отырады делінген. Бүгінгі таңда білім беру саласына бірінен соң бірі енгізіліп жатқан реформалар осы пікірді дәлелдеп тұрғандай. Білім беру жүйесіне енгізілген соңғы реформа - әлемдегі білім беру жүйесі озық, дамыған елдің білім беру жүйесінен алынған сындарлы оқыту теориясы. Бұл теорияның ерекшелігі – алған білімді иеленіп қана қоймай, оны қажет жерінде тиімді қолдана білу. Сондықтан, Қазақстан Республикасы педагог қызметкерлердің біліктілігін арттырудың деңгейлік курстарын ұйымдастырып, мұғалімдердің тәжірибелеріне өзгеріс енгізуіне ықпал етуде.

Мен де осы аталған курстың бірінші (ілгері) деңгейін 02.03-08.06.2014ж. аралығында оқып, сертификатын иелендім. Бул курс менің тәжірибемнің өзгеруіне үлкен үлес қосты. Сындарлы оқыту теориясы бойынша оқушыға берілетін білім дайын күйінде емес, оқушылардың оқуына жағдай жасай отырып, өздігінен білім алуына мүмкіндік жасау. Бұл бағдарламадан күтілетін нәтижелер мұғалімдерді оқушыларға қалай оқу керектігін…