Климат өзгеруі мен су тапшылығы туралы экология мақаласы

Экологиялық: Климаттың өзгеруі, су тапшылығы және экологиялық белсенділік

Бүгінгі әлем – бұрын-соңды болмаған сынақтар кезеңінде тұр. Ауа райының шектен тыс құбылуы, жауын-шашын мөлшерінің өзгеруі, шөлейттену мен су ресурстарының сарқылуы – адамзаттың табиғатпен қарым-қатынасы шектен шығып кеткенін анық көрсетіп отыр. Бұл – жай экологиялық құбылыс емес, өркениеттің болашағына тікелей төнген қауіп.

Климаттың өзгеруі – қазір ғылыми емес, әлеуметтік және саяси тақырыпқа айналды. Себебі бұл мәселе әрбір елдің экономикасына, азаматтардың өмір сапасына, тіпті азық-түлік қауіпсіздігіне әсер етіп отыр. Соңғы жылдары жаһандық орташа температура бұрын-соңды болмаған қарқынмен өсіп келеді. Қуаңшылық жиілеп, орман өрттері күрт көбейіп, мұздықтар еріп жатыр. Қазақстанда да бұл үрдіс айқын сезіледі – Арал теңізінің тартылуы, Сырдария мен Іле өзендерінің деңгейінің төмендеуі, құрғақ далалар мен таулы аймақтардағы экожүйенің бұзылуы осының дәлелі.

Су – ХХІ ғасырдың ең күрделі дағдарысы болып келеді. Қазіргі таңда су тапшылығы әлем халқының үштен біріне тікелей әсер етіп отыр. Қазақстан да бұл мәселеден сырт қалмаған. Бір қарағанда, бізде өзендер мен көлдер көп сияқты көрінеді. Алайда трансшекаралық өзендерге тәуелді ел ретінде біз көрші мемлекеттердің су саясатына тәуелдіміз. Сонымен қатар ауыл шаруашылығындағы ескі технологиялар, су ысырапшылдығы, қала инфрақұрылымындағы тозған жүйелер жағдайды ушықтырып отыр. Сарапшылардың айтуынша, 2040 жылға қарай Қазақстанның кейбір өңірлерінде су жетіспеушілігі өткір дағдарысқа ұласуы мүмкін.

Экологиялық белсенділік – енді таңдау емес, қажеттілік. Дәл қазір бізге керегі – бейжайлықтан арылу. Экология – тек мамандардың, үкіметтің немесе халықаралық ұйымдардың мәселесі емес. Бұл – әр адамның өмірлік жауапкершілігіне айналуы тиіс құндылық. Қазақстанда соңғы жылдары экологиялық қозғалыстардың белсенділігі артып келе жатқаны қуантады. Жастар экологиялық акцияларға қатысып, ағаш отырғызып, пластик қалдықтарды сұрыптап, әлеуметтік желіде белсенді пікір білдіре бастады. Бұл – дұрыс бағыт. Бірақ жеткіліксіз..

Қорытындылай келе, экология – ертеңгі күннің емес, бүгінгі күннің басты мәселесі. Барлығымыз өз өмір салтымызға, тұтыну мәдениетімізге сын көзбен қарап, табиғатпен үйлесімде өмір сүруді үйренуіміз керек. Болашақ – әрекет ететіндердің қолында.