Көлік түрлері және Ш дыбысы бойынша ашық сабақ

Ашық сабақ

«Көліктің түрлері. «Ш» дыбысы.»

Өткізген: логопед А.С.Бисембаева

Сабақтың тақырыбы: Көліктің түрлері. «Ш» дыбысы.

Сабақтың мақсаты:

1) Көліктер түралы туралы түсінігін бекіту, олардың түрлерін, атауларын қайталау. «Ш» дыбысының артикуляциялық кескінін еске түсіре отырып, «ш» дыбысын жеке түрде, буын ішінде және сөз ішінде анық, дұрыс айтуға дағдыландырып, сөз құрамынан «ш» дыбысының орнын таба білуге үйрету. Артикуляциялық жаттығуларды дұрыс жасауға машықтандыру.

2) Фонематикалық есту, есте сақтау, ойлау қабілеттерін дамыту. Сөйлеу мүшелерінің қимыл-қозғалысын жетілдіру. Сөздік қорын молайту.

3) Жол жүру ережесін, қауіпсіздік ережесін сақтай білуге үйрету. Ұқыптылыққа, тазалыққа баулу, дүниетанымын кеңейту.

Сабақтың түрі: жеке, қайталау.

Сабақтың көрнекілігі: айна, «Ш» дыбысының артикуляциялық кескіні, карточкалар, суреттер, компьютер, көліктердің суреті, күннің суреті.

Сабақтың барысы:

1. Ұйымдастыру бөлімі.

- Сәлеметсіңбе, Наргиза?

- Бүгін біздің сабағымыз ерекше болмақ, өйткені бізге қонақтар келді.

- Қане, қонақтармен де сәлемдесіп ал.

- Өте жақсы.

Психологиялық дайындық.

- Наргиза, мынау не?

- Ия, бұл күн.

Олай болса, қолымызды жүрегіміздің түсына қойып, күннің жылуын сезініп, қонақтарға шашайықшы.

- Өте жақсы. Енді сабаққа дайынбыз ба?

- Алдымен біз сөйлеу ережесін еске түсіріп алайықшы:

Дыбыстарды дұрыстап,

Сөйлейміз біз анықтап.

Жұрнақ-жалғау жалғаймыз

Сөзден сөйлем құраймыз.

Артикуляциялық жаттығулар.

- Жарайсың, енді біз артикуляциялық жаттығуларды орындаймыз.

«Ат шауып келеді»

Ауызды кең ашып, тілді таңдайға жабыстырып, баяу қағу керек.

«Саңырауқұлақ»

Ауызды кең ашып, тіл ұшын таңдайға жапсырып ұстап тұру керек.

«Тәтті тосап»

Жалпақ тілмен жоғарғы ерінді жалап, ауыз қуысына тереңрек кіргізіп ұстау.

«Сағат»

Ауызды ашып, тілді оңға-солға қозғалтады, бірақ тіл ерінге тимеу керек

«Әлпеншек»

Тілді жіңішкертіп ұстап, кезекпен жоғарғы ерінге төменгі ерінге қарай созу.

«Тіс тазалау»

Аузыңды кең ашып, тілдің ұшын тістің ішкі жағынан оңнан солға қозғайсыңдар, төменгі жақты қозғалтпау керек. Еріндері сәл ашық, тістері көрініп тұруы керек.

«Гармошка»

Күлімсіреп, ауызды сәл ашу, тілді таңдайға жапсырып, ауызды ашып-жабу. Бұл арқылы тіл асты байланысы дамытылады. Біртіндеп ауызды кеңірек ашып, тілді жоғарғы қалыпта ұзақ уақыт ұстауды үйрену.

2. Жаңа сабақ.