Мектепке дейінгі білімдегі үздіксіз даму туралы эссе

«Үздіксіз менің білімім» эссе

Тақырыбы: Мектепке дейінгі білім беру үрдісінде жобалау технологиясын

пайдаланудың тиімділігі

Мектепке дейінгі білім беру саласында соңғы жылдары оқу, оқытудың, тәрбиелеу үрдістерінің дәстүрлі, дәстүрлі емес инновациялық түрлері ұсынылуда. Инновациялық әдіс-тәсілдерді іздену қазіргі қоғамның талаптарына негізделген. Қазіргі оқытудың мақсаты: балаларды ынталандыру, оқу, оқыту үрдісіне ішкі уәждерін қалыптастыру, жағымды оқу ортасын құру. Оқу процесін қызықты ету және мектепте алған білімін шынайы өмірде қолдана білу. Менің педагогикалық қызметімде жобалау технологиясы үлкен мүмкіндіктер ашуға ықпалын тигізуде.

Жобалау технологиясы – балалардың жоспарлау және күрделене беретін тапсырмаларды орындау арқылы меңгеретін білімін жеңілдететін технология түрі. Жобалау технологиясы балалардың қызығушылық ынтасын дамытады, өз бетімен және ата-аналары көмегімен жұмыстарын жүргізу арқылы білімдерін жетілдіреді, ақпараттық бағдарлау біліктілігін, сыни тұрғыдан ойлау қабілетін қалыптастыру арқылы баланы болашақта әр түрлі жағдаяттарда, әр түрлі қоғамдық ортада өзін-өзі көрсете білуге бейімдейді. Жобалау технологиясының ерекшелігі мынада: балалар тәрбиешімен бірге қоршаған ортаны зерттейді, таныған, білген, көрген ақпаратын ортақ бір жүйеге тәрбиешінің көмегімен жүйелеп, жоба жасауға тырысады. Мәселен, пияз өсіру арнайы жоба үрдісінде, күнделік жүргізу барысында ішкі мүмкіндіктеріне орай, кейбір балалар ертегі құрастыра білсе, кейбіреулері мүсіндеп, ал басқа кейбір балалар суретін салып, сөзбен қорғай білді. Қорғау барысында балалар ойларын еркін жеткізуге тырысады. Нәтижесі анық.

Жобалау технологиясы туралы ізденгенім балалардың қабілеттерін қалыптастыруға, көре білуге өзінің септігін тигізуде. Менің қызметімдегі білік мен білімді жетілдіруде осы технологияның қыр-сырын зерттеу, қарастыру үздіксіз процесс болмақ.