Менің мектебім тақырыбына ашық сабақ, 5-сынып

Сабақтың тақырыбы: Менің мектебім. Сын есім Сабақтың мақсаты: 1. Оқушылардың сын есімнен алған білімдерін еске түсіре отырып, білімдерін тереңдету, пысықтау; 2. Аталған мәтінмен жұмыс жүргізу арқылы, жеке тұлғаның тілдесім әрекетінің барлық түрін игеру дағдысын қалыптастыру, сөйлеу машығын үйрену мақсатына орай жаңа ұғымдармен танысып, сөздік қорын байыту, 3. Осы заманның, сөйлеу мәдениеті, тіл байлығы, ақыл деңгейі дамыған озық ойлы азаматын тәрбиелеу.

Сабақтың типі: жаңа ұғымды меңгерту.

Сабақтың түрі: дамыта оқыту технологиясына негізделген ашық журнал сабағы.

Сабақтың әдісі: түсіндірмелі, сұрақ-жауап, ой қозғау, талдау- жинақтау.

Сабақтың көрнекілігі: слайдтар, сызбалар, суреттер.

Сабақтың барысы:

І Ұйымдастыру кезеңі 1) Оқушылармен сәлемдесу. 2) Оқушылардың зейіндерін сабаққа аудару.

Мұғалім: - Қане, балалар, бүгінгі сабағымызды бір-бірімізге деген жылы лебіздерімізбен бастайық (психологиялық тренинг). Оқушылар бір-біріне: Инабатты, мейірімді, білімді, тәрбиелі, сыйлы, ізденімпаз, адал бол» деп ақ ниеттерін білдіреді.

ІІ Қызығушылықтарын ояту. Сабағымыздың ұраны: Ана тілің – арың бұл, Ұятың боп тұр бетте. Өзге тілдің бәрін біл, Өз тіліңді құрметте!

ІІІ Үй тапсырмасын сұрау. Үйге: тимейді, қозғайды, соғады етістіктерін жіктеп келу берілген.

ІV Үй тапсырмасын қорытындылау

1) Сонымен, балалар қазақ тілінде жалғаудың қанша түрі бар? 2) Көптік жалғауларын атап бер. 3) Қазақ тілінде қанша септік бар? 4) «Ойыншы» сөзін жіктеп бер. 5) «Сүйікті ойыным» сөзін тәуелде. 6) «Асық» сөзін септеп бер.

V Өткен сабақты қайталау. Мұғалім:

Балалар, біз өткен сабақтарда қандай сөз таптарымен таныстық. Есімізге түсіріп көрейікші. Қане, кім өткен сабақтар бойынша қандай дайындықпен келгенін көрейік.

Сендерге қызықты болу үшін, сөз таптарын бір үлкен мемлекет деп ойлайық.Сөз таптары мемлекетінде тоғыз қала бар делік. Әр қаланың атқаратын қызметі мен жауап беретін сұрақтары бар. Енді өзімізге таныс зат есім, сын есім, сан есім, есімдік, етістік елдеріне саяхат жасайық. 1) Зат есім дегеніміз не? 2) Сын есім дегеніміз не? 3) Сан есім дегеніміз не? 4) Есімдік дегеніміз не? 5) Етістік дегеніміз не? 6) Мысалдармен дәлелдеу Мұғалім: - Жарайсыңдар, балалар! Қалған сөз таптары туралы алдыңғы сабақтарда білетін боламыз.

VІ Жаңа сабақ

Ал, балалар, өз біліктілігіміздің, сөз байлығымыздың молайғанын көрсету үшін, бүгінгі сабаққа әрқайсымыз белсене қатысуымыз керек.

Қане, балалар, бүгінгі жаңа сабағымыздың тақырыбын мына жұмбақтарды шешу арқылы тауып көрейікші. 1. Білімнің дәнін тереді, Балаға білім береді. (ұстаз) 2. Сабақ сайын соғылады, Тек мектептен табылады. (қоңырау) 3. Білімнің мол сый асы, Балғындардың ұясы. (мектеп) Жарайсыңдар, балалар, яғни біздің бүгінгі сабағымыздың тақырыбы: Менің мектебім.

1. Сөздікпен жұмыс. Слайдта мәтінде кездесетін сөздер орысша беріледі, оқушылар қазақша баламасын тауып, сөз тіркесін құрайды. Школа-мектеп Ученик-оқушы Учитель-мұғалім