Менің Қазақстаным туралы мақала балабақшаға

Менің Қазақстаным

Қазақстан ─ кең байтақ, жұмақ мекенім менің! Оның шалғынды даласы, басынан қар кетпес биік асқар таулары мен қылқанды, жапырақты ағаштары араласқан ормандар, мөп-мөлдір көлдер мен сағымға толы шөл даласы – барлығы, барлығы біз үшін ыстық, өйткені бұл біздің туған жеріміз, отанымыз. .. Еліміздің табиғаты өте сұлу.

Осы қасиетті жерімізді батыр ата-бабаларымыз ақ білектің күшімен, ақ найзаның ұшымен жаулардан қорғап артындағы ұрпағына ─ бізге жеткізді. Осындай киелі еліміз бен жерімізге арнап жазған ақын-жазушыларымыздың шығармалары...жүрегіңді тербетіп баурайды.

Қазақстан әр жыл мезгілдерінде тамаша!

Табиғаты көктемде әр түрлі бояулармен безендірілген: он жақта – қызыл дала, сол жақта – сары, ал ортасында көк шөп көрінеді. Самал жел өпкен жусан иісі кең даланың бұрыш-бұрышына жетеді.

Жаз ортасында, күн нұры сәулесімен жерді жіпсітіп тұрғанда, көл жағасында бәрін де ұмытуға болады. Өзіңді басқа бір ғажайып дүние, арманың орындалатын әлемде болғандай сезінесің.

Күзде барлық даланы алтын жапқандай! Тауларын көгілдір тұман басқандай, сондықтан ол күзде суық көрінеді, бірақ осы бейнесі өзінді тартып тұрады.

Қыста айнала жарқыраған күмістей, аппақ қар басады. Қазақстанның тарихы сонау жылдардан басталады. Бұл – тарихымен, көне мәдениетімен және ерекше табиғатымен бай Ұлы мемлекет. Қазақ өз тілін, мәдениетін, салт-дәстүрін қастерлеген .

Ғасырлар бойы, жылдар бойы осынау байтақ жерімізге еліміздің еңбегі, ерлеріміздің тері, қаны, қуанышы мен бейнеттері төгілген! Ұрпақтан ұрпаққа осы жерімізді, тарихымызды, тілімізді, дінімізді, мәдениетімізді, салт-дәстүрлерімізді көзіміздің қарашығындай сақтап, тапсыруымыз қажет.

Қазақстанда түрлі ұлт өкілдері тұрады. Сол барша ұлтты бауырына басқан бауырмал Қазақ халқы татулық пен достықты ежелден серік еткен.

Әр Қазақстанның азаматы осы күнді ерекше есте сақтайды және онымен мақтанады. 1991-жылы 16-желтоқсанда Қазақстан Республикасының мемлекеттік саяси тәуелсіздігі туралы конституциялық заң қабылданды. Осы жылы біздің тәуелсіздігімізге 27 жыл. Сөз жоқ, Қазақстан халқы үшін ұлы күн. Бұл барлық еңбекқорлықтың, қайраттың, сабырлылықтың, қайсарлықтың, халықтың арасындағы достықтың нәтижесі.

Біздің қазіргі Қазақстан – ол егеменді, демократиялық, зайырлы, құқықтық және әлеуметтік мемлекет. Әрине, бізге әлі алдымызға қойған мақсаттарымызға ұмтылу керек. Ғылымды дамыту, ауылға көмек, жемқорлықты жою керек. Біздің болашағымыз біздің қолымызда. Әлі алдымызға қойған мақсаттарымыз мол. Еліміздің жетістіктері алда.

Біз – бақыттымыз! Біз осы тарихты жасаушымыз! Әрқайсымыз өзіміздің кішкентай үлесімізді осы еліміздің дамуына қосып отырмыз. Оның ішінде «Spectrum» балабақшасының жеткіншектері де бар.