Мұғалім болашақтың білім нәрін себуші эссе

Мұғалім – болашақтың білім нәрін себуші

“Мұғалім” мамандығын - “өзін-өзі дамыту” тіркесімен синоним ретінде алып қарастырсақ қате болмайды деп есептеймін. Мұғалімдік-үздіксіз дамуды, білім алуды, рухани алда болуды, әрдайым үлгі аларлықтай тұлға болуды қажет ететін мамандық. Осы жолды таңдаған әрбір адам еңбек жолында күтілетін талаптар мен міндеттемелердің көп және тұрақты түрде болуы қажет екенін ескеруі керек.

Инновациялық білім беру мен технологияның қарыштап дамыған заманында барлық қызмет иелері ілесуі міндет, алайда мұғалімдерге жүктелген міндет - ерекше. Себебі, біз-мұғалімдер, алдымызға білім алам деп келген оқушыларға жаңа заманға сай оқытумен қамтамасыз етуіміз керек. Ол үшін оқытылу тиіс пәнді терең біліп, түсініп, алған білімді оқушыларға жеңіл жолмен, әртүрлі оқушылар жеңіл игеретін платформалар көмегімен жеткізе білуіміз қажет.

“Ұстаздық” қызмет тек қана оқыту емес, сонымен қатар, тәрбие процесінің көмегімен толыққанды қызметке ие болатын белгілі. Тәрбие жұмыстарын жүргізу - мұғалімнің рухани және мәдени дүниесі ұштасқанда жүзеге асады, яғни мұғалім өзінде бар қасиеттерді ғана балаларға игерте алады. Сол себептен, біз тек пәнді ғана жетік білмей, өзімізді тұлғалық жағынан үлгі беретіндей дамытып, Абай атамыз:

“Ақырын жүріп, анық бас,

Еңбегің кетпес далаға.

Ұстаздық еткен жалықпас

Үйретуге балаға”,- дегеніндей оқушыларға үйретуден шаршамауымыз керек.

Абай Құнанбаев “ақыл, ыстық қайрат, жылы жүрек” адамның бойынан табылғанын құптайды. Осы орайда, мұғалімнің бойынан табылу керек ең маңызды қасиеттердің бірі-жылы жүрек. Біз оқушыларға жастайынан “мейірімділік” ұғымын терең түсінуіне, оның адам бойында табылуының маңызына ерекше көңіл бөлеміз. Жаңа технология заманында, болашақта роботтар оқыту жұмыстар жүргізеді деген болжам бар. Алайда, роботтар мұғалім үйрететін адами құндылықтарды үйрете алады ма?

Келесі қасиет - ыстық қайрат, яғни оқушыларға білім беруге, болашаққа бағдар көрсетуіне, қоғамға пайдасын тигізуге деген құлшыныс. Бұл ақылмен біріккенде толық мағынаға ие болады деп есептеймін.

Қорыта келе, нағыз ұстаз бола білу - еңбек, үздіксіз даму, білім алу, қабілеттерді дамыту әрекеттерін біріктіре орындағанда жүзеге асады. Бұл қасиеттерді бойымыздан табыла білуіне жағдай жасау - әрбір мұғалімнің міндеті.