Одағайға байланысты қойылатын үтір туралы сабақ жоспары

Сабақтың тақырыбы: Одағайға байланысты қойылатын үтір

Сабақтың мақсаты:

1.Білімділігі: одағай сөздің мағынасын және қолданылу себебін түсіндіру, одағайдың басты белгісін таныту, сөйлемдегі орналасу ретіне қарай үтірмен қалай ажыратылатынын меңгерту.

2.Дамытушылығы: үтір қандай орындарда, не үшін қойылатыны, оны қою үшін тілдік қандай белгілерін білу керек екенін түсіндіру. Проблемалық жағдайлар мен күрделілік деңгейі артқан тапсырмаларды шешу кезінде дербес ойлану қабілеттерін дамыту.

3.Тәрбиелілігі: арнайы тапсырмалар арқылы тілге деген сүйіспеншілігін арттыру, тыныс белгілерді орынды қолдануға,тиянақтылыққа тәрбиелеу.

Сабақтың типі: жаңа білімді меңгерту сабағы

Сабақтың түрі: аралас сабақ

Сабақтың әдісі: баяндау, сұрақ-жауап, талдау, іздендіру.

Сабақтың көрнекілігі: электрондық оқулық, кестелер, слайд, семантикалық кесте, интерактивті тақта, т.б.

Сабақтың барысы:

І. Ұйымдастыру кезеңі

ІІ.Үй тапсырмасын тексеру.

Құрмалас сөйлемдерге байланысты қойылатын үтір. (тақырыпты оқу, ереже жаттау)

Үйге берілген 179, 182, 186-жаттығуларын тексеру.

ОЖСБ сынағына дайындығын тексеру бағытында тест сұрақтарын беру:

1. Туынды сөзді анықтаңыз

а) заманның

в) заманға

с) заманнан

д) заманымыз

е) заманауи

2. Берілген сөйлемдегі жалғаулық шылаудың түрін анықтау.

Біресе қар жауады, біресе жаңбыр жауады.

а) талғаулы

в) себеп-салдар

с) кезектес

д) ыңғайлас

е) қарсылықты

3. Анықтауыш қай сөз табынан болғанын анықтаңыз. Жанған от тәнді жылытады.

а) есімше

в) ырықсыз етіс

с) көсемше

д) ортақ етіс

е) өздік етіс

4. Ашық буын = ашық буын = ашық буын және бітеу буын = бітеу буын сызбасына сәйкес қатар.

а) айнала жарық

в) тамаша тілек

с) балаша қуан

д) айнала аппақ

е) балаша күлмес

5. Жасалу жолына сәйкестендір. Сын есім + зат есім = ойын атауы

а) ақшелек

в) тауықкөз

с) көкқұтан

д) соқыртеке

е) ақсақал

Тест сұрақтарының дұрыс жауаптары: Е, С, А, Е, Д.

ІІІ. Жаңа сабақ:

Пунктуация дегеніміз не?

Тыныс белгілері болмаса немесе дұрыс қойылмаса, мәтіндегі ойды дұрыс оқу, түсіну мүмкін бе?

Ой жеткізудегі бет-жүз құбылысын, қол қимылдары мен дауыс ырғағын қағазға түсіре аламыз ба? Бұларды қандай белгілер алмастыра алады?

Сөйлем ішіне қойылатын тыныс белгілерді ата.

Үтір қайда қойылады?