Ойдағы бейнелерді дамытуға арналған психологиялық жаттығу

Тақырыбы:«Ойдағы бейнелер және эмоциялар»

Мақсаты: ойда бейнелерді қалыптастыруды дамыту.

Жүргізуші: «Мен қазір сендерге сөйлемдер оқимын. Сендер әр сөйлемнің соңында көздеріңді жұмып, Соған сәйкес келетін суретті көз алдарыңа елестетіңдер.

1. Киікті аулап жүрген арыстан. 2. Құйрығын бұлғаңдатқан күшік. 3. Тамаққа қонған шыбын. 4. Түнде найзағай ойнап тұр. 5. Өзіңнің ең сүйікті көйлегіңдегі дақ. 6. Гүлді суырушы қыз және т.б.

Енді бәріміз парақ алып, есімізде қалған сөйлемдерді қағаз бетіне түсірейік.»

Бұл жаттығуды тек естіп есте сақтауды емес, көріп есте сақтауды дамыту үшін де қолдануға болады. Ол кезде жүргізуші сөйлемдерді оқымайды. Сөйлемдерді слайд арқылы көрсетеді де, балалар оқып болған соң көздерін жұмып, елестетеді.

Сергіту сәті. Ойын. «Насос және доп» Мақсаты: бұлшықетті жаттықтыру Екі бала қатысады. Бірі – үрленетін үлкен «доп», екіншісі – үрлейтін «насос». «Доп» желі шығып кеткен доптың кейпін ұстанады. Яғни екі аяғын бүгіп отырып, басын салбыратып, екі қолын айқастырып отырады.

«Насос» «допты» үрлей бастайды. Қолын сермеп, «с» әрпін айтып жүреді. Әрбір жел берген сайын доп үрлене береді. Бірінші рет жел үрлегенде доп терең дем алады, екіншісінде – бойын тіктеп тұрады, үшінші рет жел бергенде – басын көтеріп, екі ұртын толтырып, екі қолын екі жаққа жаяды. «Доп» үрленді, доптан насосты суырып алады. Доптан жел «ш» деген дыбыспен шығып, қайтадан бастапқы қалпына келеді. Ойыншылар рольдерімен алмасады.

Ойын. «Мен қапшыққа салдым» Мақсаты: естің көлемін ұлғайту. Жүргізуші ойынды мына сөздермен бастайды: «Мен қапшыққа алма салдым». Келесі оқушы жүргізушінің сөзін қайталап, оған өзі тағы сөз қосады, мысалы, «Мен қапшыққа алма, банан салдым». Т.с.с.

Бұл ойында жеңімпаз болмайды, тек ең бастысы бала өзі есінде сақтап қалғанды еш қиындықсыз қайта жаңғырта алуы қажет.