Қазақ қызы тәрбиесіне арналған ашық сабақ материалы

Отбасы, неке, отбасындағы қыз баланың тәрбиесі

Тәрбие сағатының мақсаты: Қазақ қызының бойындағы ұлттық дәстүрімізге әдептілік, инабаттылық, көріктілік, ептілік, сұлулық сияқты ұлттық қасиеттерді қыздардың бойына сіңіру, тәрбиелеу.

Көрнекілігі: нақыл сөздер, слайд, суреттер

Барысы:

Ұйымдастыру: Сәлеметсіздер ме, құрметті ұстаздар мен студенттер! Бүгінгі «Отбасы, неке, отбасындағы қыз баланың тәрбиесі» тақырыбындағы ашық тәрбие сағатымызды бастаймыз.

Топ жетекшісі: Қазақ халқы «Қыз» деген сөздің өзін әдеміліктің, инабаттылықтың, сұлулықтың белгісі деп таныған. Халқымыздың халық ауыз әдебиетінде көптеген ақындарымыз қызға көптеген керемет суреттемелер берген.Сондай-ақ қыз баланың ұқыптылығын, шеберлігін, сүйкімділігін, жанының нәзіктігін, өнер, білімге бейім тұратынын жоғары бағалап, оның ол қасиеттерін бейнелі сөздер арқылы ерекше көрсеткен.

Мысалы: «Қыздың жиған жүгіндей», «Қыздың тіккен кестесіндей», «Қыз –елдің көркі, гүл жердің көркі», «Жақсы қыз – жағадағы құндыз», «Қызы бар үйдің қызығы бар»

Халық арасында бойжеткен қызды ажарына қарап бірнеше жақсы сөздермен теңеу берген: Әдемі қыз,Көрікті қыз, Шырайлы қыз, Сұлу қыз, Ару қыз, Ажарлы қыз, Әсем қыз т.б.

Қыз сұлу көрінеді қылығымен

Жарыса төгілген қос бұрымымен

Бұл күнде сұлулықтың үлкені осы –

Қыз сұлу көрінеді білімімен

Қыз сұлу көрінеді шашыменен,

Ай қабақ, қиғаш қара қасымен

Қыз сұлу көрінеді толғанайдай

Он бес пен он сегізде жасыменен

Қыз сұлу көрінеді өрнегімен

Тізілтіп сөз маржанын тергенімен

Майысып бұратылып, майда басып,

Жаныңа наз қылық пен келгенімен

Дарытқан бар асылды өз елінен

Қыз сұлу көрінеді өрнегімен

Құлпырып қазағымның арулары

Өткендей сұлулықтың елегінен

Бейнеролик: Қыз тәрбиесі

Ал қазір отбасында қыз бала тәрбиесі қандай? Жаңағы бейнероликтен біз нені аңғарамыз? Бейнероликтегі қазіргі қоғамда қай қыздың тәрбиесі басымырақ? Сіз қай қыздан үлгі алар едіңіз?

Демек, болашақ жас ұрпақты адамгершілігі мол, иманды, өнегелі, өнерлі етіп тәрбиелеу қазіргі отбасындағы үлкен міндет. Сонымен қазақ отбасында тәрбиенің негізі – ұлттық салт – дәстүрлер.

Келесі кезекті қыз балалардың ұлттық киімдері мен әшекей бұйымдарына береміз.

Қазақ қыздарының ұлттық киімдерін ата.

Қазақ қыздарының қандай ұлттық бас киімдерін білесің және оларды кімдер киген?