Қош келдің, алтын күз: балабақшаға арналған ертеңгілік сценарийі

«Қош келдің, Алтын күз!»

мектепалды тобы

Ақтөбе қаласы, №38 «Әлем» МДҰ музыка жетекшісі Тажбаева Д.М.

Жүргізуші: Келді міне алтын күз

Сары шашты жарқын күз

Мол өнімді ісімен

Таңдандырып халқын күз.

-Құрметті балалар, әріптестер! Сіздерді берекелі де ырысты Алтын күз мерекесімен құттықтаймыз! Сіздерге молшылық, құт-береке, ырыс ала келсін!

Тамила: Қыстың жақын қалғанын

Жапырақтар білгендей

Желмен ұшып барады

Жерге қонып үлгермей.

Айшабибі: Келістіріп бар сәнін

Берген өзі табиғат

Алтын күзді ал қане

Қарсы алайық, балалар!

Жүргізуші: Күз мерекесіне Алтын күздің өзі де келе жатыр екен, қарсы алайық.

Залға әсем әуенмен Күз ханшайымы кіреді.

Күз ханшайымы: Уа халайық дархан далам армысың

Табиғатым, жаны жайсаң тал мүсін

Ханшайымы күздің бүгін келіп тұр

Алмақ болып бар халқымның алғысын.

-Сәлеметсіңдер ме, кішкентай балақайларым, сендерді көргеніме өте қуаныштымын.

Жүргізуші: Қош келдіңіз, Күз ханшайымы! Төрлетіңіз! Біздің балалар сізге арнап өз өнерлерін дайындап келді. Тамашалаңыз!

Күз ханшайымы: Әрине, балалар мен сендердің өнерлеріңді тамашалайын.

Ән: «Алтын Күз»

Күз туралы тақпақтарды қабыл алыңыз.

Қ.Аружан: Жоғары шық кел төрлет

Абыройың, бағың бұл

Көңілдерді ән тербеп

Арналады саған жыр.

Иса: Сарғайды тоғай

Сап-сары маңай

Соңғы әнін айтып

Құстар кетті қайтып.

Ж.Амина: Жомарт көңіл жарқын күз

Берекесі елімнің

Қош келіпсің Алтын күз

Құт қонағы төрімнің.

Сұлтан: Береке бақ дарыған

Жомарт көңіл жарқын күз

Сары алтынға малынған

Жетті міне Алтын Күз!

Күз ханшайымы: Бәрекелді балалар, енді сендерге жұмбақтар жасырайын.

Жұмбақтар:

Тырс-тырс етіп тамады

Сайға қарай ағады. (жаңбыр)

Ағайынды бәрі,

Жазда жасыл, күзде сары. (жапырақ)

Жүргізуші: Күз ханшайымы, балалар жұмбақтардың шешуін тапты. Енді сізге арнап жапырақтар биін билеп берсін.

Би: «Жапырақтар»

Әуенмен тиін кіреді (қолында себеті бар)

Тиін: Орманнан келем мен тиін

Көңілсібін, шаршадым

Балалардай көңілді

Қалай болам мен енді.

Балалар: Сәлеметсіз бе, тиін!

Жүргізуші:Тиін, қош келдің, сен неге көңілсізсің.

Тиін: Ой балалар, күз мезгілі келді, мен өзіме саңырауқұлақтар жинап алып едім, кептіруге көмектесіңдерші.

Жүргізуші: Балалар, көмектесеміз бе? (Әрине)

Ойын: «Саңырауқұлақтар кептіру»