Ұлағатты ұстаз туралы мақала бастауыш сыныпқа

Ұлағатты ұстаз

Нағыз ұстаз болу – бақыт әрі абырой. Шындығында, мұғалім болу оңай болып көрінгенмен, ал нағыз ұстаз болу екінің бірінің қолынан келе бермесі анық. "Ұстазды алтын діңгекке теңер едім", – деп ұлы педагог Ы. Алтынсарин айтқандай, ұстаз жолы – қиыншылығы мен рахаты бір басқа жетерлік мамандық атаулының ұлысы. Білім беру кеңістігінде тәжірибелі де білімді, өз мамандығының хас шебері кәсіби ұстаздар жетерлік. Солардың бірі – жалпы орта білім беретін Шипов мектебінің бастауыш сынып мұғалімі Тұрманова Жаңылсын Ізғалиқызы. Ұзақ жылдар бойы ұстаздықтың ұлы жолында өзінің айшықты еңбегімен дараланған Жаңылсын Ізғалиқызы жайлы ерекше ілтипатпен айтуға болады. Ол – ұлағатты ұстаз. Себебі ғибратты ғұмырының қымбат шақтарын болашақ буындарды оқыту мен тәрбиелеу ісіне арнады. Өз ісіне берілген, шәкіртінің жанына нұр құя білген Жаңылсындай ұстаздың өмірі – болашақ үшін үлкен өнеге.

Ол Зеленов ауданы, Чернояр ауылының тумасы. Ата-анасы қарапайым шаруа адамдары болды. Аяулы анасы мен асқар таудай әкесі балаларының тиісті білім алып, үлкен азамат болуын армандады. Әсіресе, қыр гүліндей құлпырған қызғалдақтарының ішінен ортаншысы Жаңылсынның болашағына ерекше үлкен үмітпен қарады. Жастайынан білімге құштар Жаңылсын ата-анасының сеніміне еш шүбә келтірген емес. Мұғалім болу арман тұлымы желкілдеген жас қызды 8-сыныптан соң Орал қаласындағы педагогикалық училищеге әкеледі. Оқу орнын үздік аяқтаған жас маман жолдамамен алғашқы ұстаздық еңбек жолын Камен ауданы, Логашкин ауылындағы Шипов орта мектебінің бастауыш сынып мұғалімі қызметінен бастайды. "Жас келсе – іске" дегендей, аз ғана уақытта жас маман аталмыш мектептің тәжірибелі ұстаздарынан мұғалімдік мамандықтың қыр-сырын жан-жақты түсініп, үйреніп, оған өз талпынысын қосып, ұжым ортасында беделді бола білді. Осы бір ғана мектепте 40 жылға жуық ұстаз боп қызмет атқарып келеді. Оң мен солын танымай келген бүлдіршінді өз баласындай баурап, алғаш қалам ұстатып, білім нәрін құйып, мәуелі бәйтеректей өсірді. Бала жанының бағбаны болған 40 жылға тарта уақытта алдынан қаншама шәкірттері қанат қағып, қияға самғап, өмірдің