Ұстаз мамандығы – жүрегімнің қалауы эссе қазақ әдебиеті

Эссе «Ұстаз мамандығы – жүрегімнің қалауы»

Барлық бүлдіршіндердей, мен де балалық шағымда кім болатыным туралы армандайтынмын. Адамдарды ажалдан қорғайтын дәрігер болу, көрермендерді аузына қарататын әнші болу, жұмысшыларды дәмді тағаммен тамсандыратын аспаз болу - бақытты да балғын балалық шағымдағы армандарым болып еді.

Уақыт өте келе, мектеп қабырғасында жүргенде ғана болашақта кім болатынымды анық шештім: мен ұстаз боламын. Бірақ бұл шешімге де аяқ асты келген жоқпын. Менің бұл жолды таңдауыма себепкер болған менің сүйікті ұстазым – Байболатова Төлеухан апай. Төлеухан апай өте шығармашыл, білікті, бала жанын түсіне білетін, ұстамды, мейірімді болатын. Қазақ тілі мен әдебиеті сабақтарында мен бір сиқырлы әлемге кіргендей, өзімді кейіпкерлермен бірге жүргендей сезінетінмін. Қазақтың бай, көркем тілі мені қатты қызықтырды.

Ұстазымнан үлгі алуға, оған барынша ұқсауға тырысатынмын. Әлбетте, сол кісі менің қайталанбас балалық шағымның идеалы болды.

Мен- Ұстазбын! Әлі есімде алғашқы шәкірттерім, сабақтарым, қандай ынтамен сабақтарыма дайындалғаным. Мектеп ұжымымен, оқушылармен алғашқы күннен -ақ менің қарым –қатынасым жақсы сыйластықта құрылды.

Мен – ұстазбын! Бұл мамандығыммен мен мақтана аламын. Ешқашан да осы мамандықты таңдағаныма өкінген уақыттарым болған емес!

Шәкірттеріңе қазақтың көркем тілі мен әдебиетінің асыл сөздері әлемінің сырын ашу қандай керемет!

Мен білім саласында қызмет етіп келе жатқаныма отыз жылдан астам уақыт болды. Шегі жоқ балалық әлемінде оқушыларыммен бірге өмірімді өткізу –мен үшін үлкен бақыт. Шәкірттеріммен бірге қиындығы мен қызығы мол білім дариясында бірге жүзіп, олардың әр жеңісіне, кішкентай жетістіктеріне қуанып, олармен мақтанамын.

Менің ойымша, ең бақытты адам –ол ұстаз. Ол әрдайым балалардың жанында жүріп, өзін де бала сияқты сезіне алады, өз тәрбиеленушілерімен бірге оқушы сияқты болып, олармен бірге өседі, олардан үйренеді.

Тағы бір айта кететін жайт – неғұрлым ұстаз шын жүрегімен өз шәкірттері үшін қуанса, абыржыса, қайғырса, соғұрлым оқушылары да ризашылықтарын білдіреді.

Ұстаз! Тамаша мамандық! Басқа мамандықтарға қарағанда тұлғаның қалыптасуына маңызды рөл атқаратын –Ұстаз мамандығы. Көбінесе пән бойынша білім мен оның мазмұны емес, ұстаз-адам оқушылардың зердесінде мәңгілік қалады. Ұстаз тұлғасынан адамгершілік қасиетті жақсы көреді, бағалайды, құрметтейді.

Бұл мамандық қаншама білім, шеберлікті қажет етеді! Себебі қаншама әр алуан сұрақтарға- күрделі, пәндік, қарапайым –жауап беру үшін, кеңес беру үшін, көмек беру үшін ұстаз әрқашан дайын болу керек.

Нағыз ұстаз қандай болу керек? Шәкірттерін алаламайтын, әділ, әр баланың жүрегінің кілтін таба білетін, әркез көмекке келіп, өз оқушыларын қорғай білетін адам. Керек болса, шәкірттері үшін өзін де құрбан етуге дайын. Ол бар берген нәрі үшін тек құрмет пен ілтипатты ғана қалайтын адам.

Бұл ұлы мамандықты таңдай отыра, біз өміріміздің салтын таңдаймыз. Және мұнда ең басты маңызды шарт – балаға деген сүйіспеншілік!

Нағыз ұстаз басқа балаларды да өз баласындай қорғап, олардың болашағын ойлайды. Мен де өз оқушыларымның жанын түсініп, олардың өмірге деген көзқарастарының дұрыс болуын, ең бастысы « Адам» болып шығуларын, өздеріне сенімді болып, арман-мақсаттарына жету үшін күресе білулерін тілеп отырамын. Маған барлық бала бірдей, әрбіреуін олар қандай болса солай қабылдаймын. Ең бастысы, әрбір тұлға қайталанбас екенін түсініп, бала бойынан оның жақсы қасиеттерін тауып, оны жетілдіре білу.