Журналистика мамандығын таныстыратын тәрбие сағаты

Журналист болғым келеді

Жалпы үлкен өмірге қадам басқан сәттен-ақ көп дүниелерге таңдау жасауға тура келеді .Ата-аналарымыз бала күнімізде үнемі біз үшін таңдау жасап, болашағымыздың жарқын болуына ықпал етсе, енді міне,есейіп,бойжеткен шағымызда барлық таңдау тікелей өзіміздің қалауымызбен жасалатын болды. Сәби күнімізде ойыншық таңдап,оқушы шағымызда мектептегі пәндер мен дос-құрбылар таңдай бастасақ,ал қазір міне мамандық таңдап,болашақты айқындайтын сәтте жетіп қалды. Мен мамандық таңдауға келгенде көп қиналып,ұзақ ойланған жоқпын.

Болашақта журналист болғым келеді. Халықпен бірге тыныстайтын, оның жоғын жоқтап, жырын жырлайтын, ақиқаттың астарына үңіліп, қашанда әділдікті жақтайтын нағыз журналист болуды армандаймын.

Бұл мамандықтың иелері — әрдайым ізденісте жүретін өте шығармашыл, еңбекқор жандар. Кездескен қиындықтарға қарамастан, өз қызметіне әрдайым мығым болады. Ешқашан айтқанынан танбайтын, батыл, шыншыл жандар. Мен де соларға қарап бой түзеп, болашақта өз еліме адал қызмет еткім келеді. Ұйқыңнан оянғанда бүгін сені қандай жаңалықтар күтіп тұрғанын білмейсің, қандай оқиғалар болып жатыр, кімнің тағдырына араша түсесің, соны ойлағанда жаның жай таппайды. Бәрі белгісіз. Құпия, белгісіз, беймәлім нәрселер адамды одан сайын ынтықтыра түседі. Мүмкін, менің де журналистикаға деген құлшынысым осы бір жұмбақты шешуге деген ұмтылыстан басталған шығар?..

Жалпы алғанда менің табиғатым кішкентай күнімнен жазуға,сөйлеуге өте жақын. Мен «кітап» деген асыл қазынамен доспын.Көп оқығанды ұнатамын.Газет-журналдардағы,теледидардағы жаңалықтар мені елеңдетпей қоймайды,түрлі бағдарламаларды көрем және оларды өздігімше сараптап,жақсысын көңілге медет тұтамын. Менің ойымда сан мыңдаған арман-тілектер,жоспарлар мен самсаған мақсаттар тұр.

« Осы мақсаттарыма жету үшін маған тек қана журналистика мамандығы көмектесе алады»деген ойға келдім.Өз қалауыммен дәл осы мамандықты таңдай отыра,ерекше құлшыныспен, шынайы сүйіспеншілікпен армандадым. Болашақта өзімнің авторлық бағдарламамды ашқым келеді. Елімді елең еткізетін тың дүние ойлап шығару жоспарда бар. Мақала жазып,өлең шығарып шығармашылықпен айналысқанды жаным сүйеді.Болашақта өзім үшін емес,елім үшін адал қызмет атқаратын халқымның қалаулы,елімнің елеулі журналисті болсам деген асқақ армандарым мені әрдайым алға жетелейді.

Зарина Кожахметова

Алматы облысы, Ақсу ауданы