Әдебиеттік оқуға қызығушылықты арттыру туралы мақала

Әдебиеттік оқу пәнін оқыту арқылы бастауыш сынып оқушыларының оқуға деген қызығушылығын арттыру жолдары

Мыңбаева Аида Амантайқызы

№101 мектеп-лицейдің

бастауыш сынып мұғалімі

Әр адамның ана тілінің баға жетпес құдіреті мен қуаты, Отанын, туған халқын сүюге тәрбиелеудегі күші жөнінде К.Д. Ушинский: «Халық тілі – тарих шекарасынан әлдеқайда әріректе басталады, оның рухани өмірі еш уақытта солмайды, қайта өмір бойы шешек атып, гүлденеді»,-деп атап көрсеткен болатын. Сондықтан да ана тілінің маңыздылығы мен құндылығына баса тоқталуға мән бердім. Себебі, кіші мектеп жасынан бастап ана тілінің нәрін, қадір-қасиетін, оның маңызын сезініп өспеген баланың ойлау қабілеттерін дамыту қиындық әкелу мүмкін.

Әдебиеттік оқу пәні бастауыш мектепте ең негізгі пәндердің бірі болып табылады. Өйткені, оқу-жазуға дағдылану арқылы басқа пәндерді оқып үйренуге жол ашылады. «Әдебиеттік оқу» пәнінің мақсаты – бастауыш сынып оқушысының жоғары сыныптардағы әдебиеттің жүйелі курсын меңгеруге дайындау, олардың әдеби сауатын ашу, оқу әрекетін қалыптастыру барысында көркем шығармаларға деген қызығушылығын арттыру, ұлтжандылық сана-сезімін дамыту, сөз өнерін шығармашылықпен игеруіне жағдай туғызу болып табылады. Мақсатқа жету үшін бастауыш сыныптың әр жылында жүйелі міндеттерді табысты орындау қажеттілігі туындайды. Көркем шығармалардың әртүрлі жанрларымен уақытылы таныстыру, оқыған шығармалары бойынша сыныптан тыс шараларды кезең-кезеңімен ұйымдастыру мұғалімнен ыждағаттылықты, балалар алдында және нәтижеге жету мақсаткерлігін қалыптастыруда үлкен жауапкершілікті, аса қызығушылықты талап етеді.

Бастауыш білім беру деңгейінде оқу техникасын меңгерту, мәтінді саналы қабылдауын қамтамасыз ету, мәтін мазмұны арқылы жалпыадамзаттық құндылықтарын, оқырмандық қабілеттерін қалыптастыру, шығармаларға талдау жасау арқылы жекелеген әдеби-теориялық ұғымдармен таныстыру, оқушылардың сөздік қорын, жазба тілін дамыту, өзіндік көзқарасы мен шығармашылығын қалыптастыру міндеттерін орындау шеберлікті қажет етеді.

Әдебиеттік оқу оқулығында шығармалар ақыл-ой, адамгершілік, еңбек, дене, экономикалық, экологиялық, эстетикалық , құқықтық және патриоттық тәрбие мен білім беретіндей әдеби-көркем шығармалар іріктеліп берілген. Әдістемелік жағынан бұл шығармалармен дұрыс жұмыс жасау арқылы оқушылардың бойында әдеби-танымдық және эстетикалық қызығушылықты оятуға, шығармашылық қиялын дамытуға, көркем әдебиетке, оқуға деген ықыласын арттыруға мүмкіндік мол болады. «Кітапсыз адам өмірі – бос. Кітап біздің досымыз ғана емес, сонымен бірге біздің тұрақты серігіміз де»-деп орыстың ағартушыларының бірі Д.Бедный айтқандай, бастауыш мектепте балаларға кітап оқуды насихаттау, кітап оқуға қызығушылықтарын арттыру ерекше құнды мәселе. Ол арнайы талдауды, әріптестердің осы мәселе төңірегінде бірлесуін, дұрыс та парасатты қадамдарды жүйелі ұйымдастыруын өте қажет етеді.

Бастауыш мектеп жасынан бастап мәтіндермен жұмыс жасау барысында мазмұндағы оқиғалар немесе кейіпкерлерге байланысты ұқсастықтар мен айырмашылықтарды ажырата алуға уақытылы бағыттап отырған…