Асылхан Табылдыұлының өнегелі ғұмыры туралы баяндама

АСЫЛХАН ТАБЫЛДЫҰЛЫНЫҢ ӨНЕГЕЛІ ҒҰМЫРЫ

«М.О.Әуезов атындағы педагогикалық колледж» КМҚК

Қабдоллаева Аружан, 1 – курс

Жетекшісі: Мусанова Адина Дашақызы

Елдің болашағын айқындайтын басты құндылықтарды жасауға бел шешіп, білек сыбанып еңбек еткен, ұлтымыздың мақтанышына айналған, өмір жолы мен атқарған ісі бүгінгі ұрпаққа өнеге боларлық қазақтың маңдайына біткен ұлағатты азаматтардың қатарында есімдері мақтанышпен, зор құрметпен аталатын азаматтардың бірі әрі бірегейі ретінде бүгінде 90 жастан асып отырған Еңбек және Ұлы Отан соғысының ардагері, «I дәрежелі Ұлы Отан соғысы», «Құрмет белгісі» орденінің иегері, КСРО Халық ағарту ісінің үздігі, ҚР Білім беру ісінің үздігі, Семей қаласының Құрметті азаматы – Бекбаев Асылхан Табылдыұлының өнегелі ғұмыры бүгінгі жастарға үлгі. Өзінің өнегелі ғұмырын ұрпақ тәрбиесіне арнаған Асылхан Табылдыұлының отансүйгіштік, адамгершілік, табандылық пен еңбекқорлықтың үлгісі болып келе жатқан бүкіл өмір жолы – ұрпағына тәлім мен тағлымға толы сабақ.

Бекбаев Асылхан Табылдыұлы – 1924 жылы 31наурызда Шығыс Қазақстан Облысы, Бесқарағай ауданы Семеновка ауылында дүниеге келген.

1933 жылы Семеновка жеті жылдық мектебіне барып, оны 1940 жылы аяқтады. Сол жылы Семейдегі геологиялық – барлау жұмысшы факультетіне түскен. Оны бітірген соң бар мақсаты жасы келіп қалған әке – шешеге тіреу болу еді. Өйткені Асылхан отбасының жалғызы болатын. Соңынан ерген інісі Жұматай сонау ашаршылық жылдары балалар үйінде шетінеп кеткен.

Осы орайда әкесі Табылдының Голощекиннің Қазақстанда «Кіші октябрь» ұранымен жүргізілген 1928 жылғы компескесіне дейін ауқатты шаруа болғандығы, оған діндарлығы қосыла келгенде басына қатер төнген зауал шақта Ресей жағына ауа қашқандығы, сол жақта орманда ағаш кесуші болып жұмысқа орналасып, ес жия бастаған кезде аяғын ағаш сындырып, кемтар болып қалғандығы, сол себептен де балалар үйіне өткізілген екі баласының бірі шетінеп кеткендігі айта берсе ұзақ әңгіме, шерлі тарих. Абырой болғанда заман сәл тәзелген бетте әке-шешесі Бесқарағайдағы ата мекендері Ойқарағайға, Семенов ауылына қайтып оралған. Замана қыспағымен тірідей жетім атанған Асылхан да әке-шешесімен қайта қауышқан.

Қиындыққа толы балалық шағынан айтылған естеліктер тебіренбей тыңдау мүмкін емес. Қазақ халқының тарихына қанды қырғын болып енген отыз екінің аштығы да балалық шақтың қасіретті суреті болып көз алдында қалып қойды [2;4].

Халқымыздың ақтаңдақ беттерімен қатар өрбіген өмір жолында Асылхан Табылдыұлының тағы бір азаматтық келбетін айқындайтын өмір белестері басталды.

1942 жылдың маусым айында жасы 18-ге толып әскер қатарына шақырылған Асылхан ең алдымен эвакуациямен Ленинградтан Петропавл қаласына көшірілген иавиация техниктерін даярлайтын әскери училищеге курсант болып қабылданады.

Содан келер 1943 жылдың қазан айында Белоруссияның Бобруйск қаласына орныққан армия генералы Гюркин қолбасшылық ететін бірінші уәде армиясына қарасты №134 авиаполкіне аға техник болып іске кіріседі Белоруссия, Прибалтика, Шығыс Пруссияны фашист басқыншыларынан азат етуге қатысты. Жеңісті Калининград түбінде қарсы алды [2;4].

Өмір тауқыметтерін көп көрсе де жігері мұқалмаған Асылхан Табылдыұлы әскер қатарынан оралған соң Семей педагогика институтының филология факультетіне түсіп, оны үздік бітіреді. Бұдан кейін осындағы педагогика институтында бір жыл оқытушы болып қызмет істейді. 1956 жылы Министрліктің жолдамасымен Семейдің педагогикалық училищесіне оқытушы қызметіне жіберілді. Өкінішке қарай, 1957 жылы солақай саясат салдарынан аталмыш оқу орны жабылып қалады.

Мұнан кейінгі жылдары Асылхан Табылдыұлы облыстық партия комитетінде қызмет істейді. Ал 1963 жылы аққа құдай жақ болып, педагогикалық училище қайта ашылғанда оның ендігі тізгіні Асылхан Табылдыұлына сеніп тапсырылған [2;4].

Қазақ халқының рухани орталығы болған, бүгінде Қазақстандағы бай тарихы бар жаңа тұрпатты білім ордасына айналған айтулы оқу орны М.О.Әуезов атындағы педагогикалық колледжінде директор қызметін 1963-1987 жылдары атқарған. Алаш арыстары оқып, білім алған, Мұхтар Әуезовтей, Қаныш Сәтпаевтай ғұламалар ұстаздық еткен оқу орнын басқарудағы басшылық, ұстаздық қызметі, талай өнегелі істердің, ауқымды жұмыстардың басын қайырып, ел игілігі үшін атқарған ерен еңбегі шәкірттеріне, көпшілікке үлгі. Соның айғағындай, оқу орнына заманымыздың заңғар жазушысы Мұхтар Әуезов есімін алып берген де, училищені жаңа қонысқа қайтадан жайғастырған да осы кісі.