Ер есімі – ел есінде тақырыбындағы қазақ әдебиеті мақаласы

ЕР ЕСІМІ – ЕЛ ЕСІНДЕ

Уақыт сүйреген арбаның дөңгелегіндей дүние талай кезеңдерді кешіп өтті. Талай-талай тау теңдес ұлдары мен теңіз тектес ұлыларын артта қалдырды. Елі мен жерінің тағдыры үшін от пен суға түскен қаһармандар өмір сүрді. Алайда, бүгінгі күні олардың барлығы арамызда жоқ. Дегенмен, олардың асыл рухтары таулар мен теңіздерден де ұзақ өмір сүретіндігіне халық сенеді. Сондай қаһарман қазақтың бірі - Ғазиз Байтасов!..

Ғазиз Байтасов – полиция капитаны. Тараз қаласында қауіпті лаңкес қылмыскерді ұстау барысында қайтыс болған батыр азамат. Ол қылмыскердің қолындағы гранатаны халыққа лақтыруға жол бермей, өз денесімен жауып қалды. Бұл оқиға күз мезгілінде орын алған болатын.

Қазақ дейтін қайсар халықтың қаһармандары аз болмаған. Сенбесеңіз, қарт тарихтан сұраңыз. Соған үңіліңіз. Ал батыры көп елдің баласы жасық, қорқақ болып өсуі мүмкін емес. Қайраттай, Ғазиздай намысты ұлдары көп елдің болашағы да жарқын боларына сенім мол. Батыр ұлдарымыздың бірі Бауыржан Момышұлының: «Алыпты алып қана арқалайды» деген жақсы сөзі бар. Бүгінгі күннің батырларын ұлықтай білу де іріліктен туатын игі іс. Ендеше, бейбіт күннің батырларын елге дәріптеп, жас ұрпаққа өнеге тұту, олардың ерлігі пен өрлігіне тағзым жасау да ұлы іс.

Гимназиямызда ержүрек батырды еске алу мақсатында «Ер есімі – ел есінде», «Ерлік – ешқашан ұмытылмайды» тақырыптарында сынып сағаттары өткізіліп, мектеп кітапханасында көрме ұйымдастырылды. Өткізілген сынып сағаттарында Ғазиз Байтасовтың өмір жолы, ерлік істері, қызметі туралы көптеген ой-пікірлер айтылып, оқушылар өзара ой бөлісті. Өшпес ерлік жасаған Ғазиз Байтасовтың құрметіне Тараз қаласында орнатылған ескерткішке гүл шоқтары қойылды.

Өмірі қысқа, ерлігі дастан ағамыздың есімі мен ерлік істері әрдайым жадымызда мәңгілік сақталады.

Мұсабекова Мәдина Даниярбекқызы