Физиканы оқытуда ақпараттық технологияларды қолдану

КІРІСПЕ

Магистрант: Сатыбалдиева Галия Касымбековна

Тақырыбы:

"Физика пәнін оқытуда 9-сынып оқушыларының білім сапасын арттырудағы АКТ-ның ролі"

"Роль ИКТ в повышении качества обучения учащихся 9-х классов преподаванию физики»

"The role of ICT in improving the quality of education of 9th grade students in teaching physics"

Ғылыми жетекші: Байжуманов М.Ж.

Кілт сөздер: АКТ құралдары, оқушылардың білім сапасы, электронды оқулық, АКТ құралдарының физика пәнін оқытудағы ролі.

Зерттеудің өзектілігі: Қазіргі уақытта ақпараттық-коммуникациялық технологияларды оқу процесінде қолдану білім беру жүйесінің дамуының басты құрамдас бөлігіне айналды.

Қазақстан Республикасының «Білім туралы» Заңының 11-бабының 9-тармағында: «...оқытудың жаңа әдістерін, оның ішінде қоғам мен еңбек нарығының өзгеріп отыратын талаптарына жылдам бейімделуге көмектесетін қашықтан оқыту мен ақпараттық-коммуникациялық технологияларды енгізу және тиімді пайдалану» қажеттілігі айқын көрсетілген.

Осы тұрғыда, Қазақстан Республикасының Президенті Н.Ә. Назарбаев 2020 жылғы Қазақстан халқына арнаған Жолдауында: «Оқу үдерісінде ақпараттық технологияларды қолдану аясын кеңейтіп, білім беру саласын жетілдіруге бағытталған жұмыстарды күшейту қажет» деп атап өтіп, жаңа ақпараттық технологияларды сабақта пайдалану процесіне жаппай көшу қажеттігін білдірген. Ақпараттық технологияларды оқыту барысында қолданудың негізгі мақсаты – Қазақстандағы бірыңғай білім беру ақпараттық ортасын қалыптастыру, заманауи ақпараттық технологияларды енгізу және еліміздің ақпараттық кеңістігін әлемдік білім беру кеңістігімен үйлестіру болып табылады.

2023-2024 оқу жылында Қазақстан Республикасының орта білім беру ұйымдарындағы оқу-тәрбие процесін ұйымдастырудың ерекшеліктері туралы әдістемелік нұсқау хатта STEAM педагогикалық тәсілдерді іске асыру бойынша ұсыныстар, цифрлық құзыреттер және дағдыларды дамыту бойынша ұсынымдар берілген. Оның негізгі ерекшеліктерінің бірі: педагогтер мен оқушыларға арналған «Цифрлық кітапхана» жобасын іске асыру. Алайда білім беру процесінде білім алушы басты назарда тұруы тиіс. Барлық оқыту процесі оған қолайлы, қолжетімді, әрі қауіпсіз орта құруға бағытталуы қажет.

Білім беру саласын ақпараттандыру ақпараттық-коммуникациялық технологияларды тиімді қолдануға негізделеді. АКТ физика пәнін оқытуда ерекше пайдалы құрал болып табылады, өйткені оларды физикалық құбылыстарды модельдеу, зертханалық жұмыстар мен есептерді шешу, зертхана құрылғыларын басқару, сондай-ақ бағдарламалық оқыту мен білімді бағалауда кеңінен қолдануға болады. Мысалы, компьютер мен оған қосылған басқа да құрылғылар мен бағдарламалар физика сабағында кеңінен пайдаланылып, оқу процесін жеңілдетеді.