Мен баланың шырағын жағу үшін мектептемін тақырыбындағы эссе

«Мен баланың шырағын жағу үшін мектептемін...»

Мұғалім ең жауапты міндет орындайды-

ол адамды қалыптастырады.

М.И.Калинин

Мен –ұстазбын! Жер бетіндегі құнды да ғұмырлы мамандық бар болар –ау, бірақ мен таңдаған мамандық бәрінен ерекше. Бұл-адамзат баласымен бірге туып, бірлесе өмір сүретін, мәңгілік жасайтын мамандық.

Бір бұлақтың көзін ашсақ, ол екі айырылып ақса, шөлдеген жан бал дәмінен сусындаса сауабын аласың. Сол секілді мен де шәкірттеріме білім беріп, болашаққа нық қадам жасайтын саналы да тәрбиелі тұлға қалыптастырып, оларды биіктерден көріп, алғыстарын алғым келеді. Шәкірттерімнің жеткен жетістіктеріне қол соғып, қолдау көрсетсем деймін.

«Тілім-тірлігім» деген тамаша сөз бар. Тілін тірлігіне айналдырған халқымыздың қасиеті мен киелілігі қандай?! Алдыма ақ адал жүрегін ашып қойып, ертеңін бізге тапсырып, болашағын тап бір біз болжап берердей мөлдірей қарап отырған шәкірттерімізге осы ғажайыптың сырын жеткізу-біздің тағдырымызға жазылған бақ пен тақ! Танылатын тұғырымыз, шығатын шыңымыз.

Мен қазақ тілі мен әдебиеті пәнінің мұғалімімін.Менің алдыма кішкене Фараби, Мағжан, Ахмет, Мұхтар, Фаризалар келеді. Олар өз есімдерінің сырын білсе де, тап қазір алаңсыз кезеңнің құшағында өзіне берілген тапсырманы орындаумен айналысып жүр. Олар қазір кішкене ғана шәкірт болғанмен, ертеңгі атына заты сай болар ел тұлғалары емес пе? Солармен бірге жұмыс жасап, жалықпай ұстаздық етіп, елдің ертеңгі болашағына үлес қосып, Алатаудың әдемі шыңдарындай мақсатты биіктерден көрінсем деймін. Ал сол биікке самғатар қос қанатымыз-шәкірттер.

Ұстаздық еткен жалықпас, Үйретуден балаға... Мұндай сөзді кемел де терең ойы бар Абай кемеңгерден артық кім тауып айтар?! Ұстаздық ету –тынымсыз еңбек, таусылмас төзім мен шынайы сезім бірлігі. Өз бойына аса ауыр салмақты, тіл мен әдебиетті балаға деген ұстаз әр сәтін сол ортаның үнін, әр жүректің сыры мен жырын тануға арнауы керек. Жүрекпен түйсіне, әр баланы түсіне отырып тануы керек, тек осылай еткен ұстаз жүрекпен сөйлеп, жүрекке жеткізеді. Тек сонда ғана баланың бойына ұлттық дүниетаным дәні түсіп, азаматтық пікірі мен тұлғалық болмысы біз қалаған деңгейде қалыптаспақ.