Өзіңді жақсылықпен таразыла ашық сабағы 2 сынып

Өзiн-өзi тану сабағының жоспары

Мектеп: №78 мектеп-гимназия Мерзiмі: 05.11.2018 ж

Мұғалiм: М. Байдуйсенова Сынып: 2ә Оқушы саны: 12 №9 сабақ

Тақырып: Өзіңді жақсылықпен таразыла

Құндылық: Ақиқат

Қасиеттер: Адалдық, шыншылдық, жауапкершілік

Сабақ мақсаты: Окушыларға адам өзін жақсылықпен таразылай алатынын түсіндіру арқылы Ақиқат құндылығының мәнін ашу.

Міндеттері:

Оқушыларға адалдық, шыншылдық, жауапкершілік қасиеттері туралы түсінік беру;

Жауапкершілік қасиетін дамыту;

Адалдық, шыншылдық, жауапкершілік тәрбиелеу.

Ресурстар:(құралдар,мәлiметтер, нақыл сөздер, бейнеролик, түрлі - түсті қағаздар, плакат)

Сабақ барысы:

1. Ұйымдастыру кезеңі.

Тыныштық сәті: «Нұрға бөлену»

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді. Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады. Олар нұр мен махаббат құралына айналды.

Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Ойша айтыңыз: «Мен нұрлымын... Нұр менің ішімде... Мен Нұрмын». Осындай Нұр, Махаббат және Тыныштық күйінде отыра тұрыңыз... Жаймен көзіңізді ашуға болады. Рахмет!

2. Үй тапсырмасын тексеру.

Оқулықтың 32 бетіндегі В.Сухомлинскийдің «Жүре алмайтын бала» әңгімесін оқу

Сұрақтар:

Павлик Василикті қалай қуантты?

Көмекке мұқтаж адамдарға жақсылық жасау қаншалықты маңызды?

Басқаларға жақсылық жасаған кезде қандай сезімге бөленесіздер?

5 «Т» ережесін еске түсіру

Баяу әуен қойылады

3. Дәйексөз.

«Жақсылықтың үлкен –кішісі болмайды»

Халық даналығы